Փաստ ինֆո

‹‹Ես հիասթափությամբ պետք է խոսեմ մեր վարած խորհրդարանական դիվանագիտության մասին, որովհետև կարծում եմ՝ առավելապես Եվրամիությունը և Եվրամիության առանձին երկրների հետ աշխատանքը պատշաճ մակարդակով չի կատարվում խորհրդարանի և, ինչու ոչ, արտաքին քաղաքական գերատեսչության մակարդակում››,-այսօր արտաքին հարաբերությունների հանձնաժողովի ասուլիսի ժամանակ ասաց ‹‹Լուսավոր Հայաստան›› խմբակցության պատգամավոր Արման Բաբաջանյանը:

Նա նշեց, որ Լեհաստանը փայլուն օրինակ է պատշաճորեն չկատարված աշխատանքի համար, և ընդգծեց, որ Լեհաստանը Հայաստանի համար չափազանց կարևոր նշանակություն ունի:

‹‹Շատերը կհիշեն, թե ինչպես էր Լեհաստանը 2008 թվականից հետո փորձում Հայաստանում ներքաղաքական ճգնաժամի հանգուցալուծման գործում դերակատարություն ստանձնել և այդ ջանքերը մենք չենք կարող անուշադրության մատնել››,-ասաց Բաբաջանյանն ու ավելացրեց, որ դրան հաջորդած Արևելյան գործընկերության շրջանակներում Լեհաստանի ջանքերը և այն աշխատանքը, որը դեսպան Ռաչիցնիսկին էր իրականացնում Հայաստանի ասոցացման գործընթացի համատեքստում նույնպես շատ մեծ են:

Նա նշեց, որ Հայաստանը 2013թ-ից հետո նվազեցրել է Լեհաստանի հետ համագործակցության տեմպն ու դինամիկան:

‹‹Լեհաստան կատարած այցից, մեր համատեղ նիստի որոշ դրվագներից ես տպավորություն ստացա, որ լեհերը նույնիսկ տեղյակ չէին, որ Հայաստանում իշխանություն է փոխվել և հեղափոխություն է եղել: Նրանք բոլորը շարունակում էին ի դեմս մեզ տեսնել մարդկանց, ովքեր ուղիղ կապ ունեն նախկին իշխանության հետ: Ասենք Ռուբեն Ռուբինյանի փոխարեն կարծես նստած էր Արմեն Աշոտյանը և հռետորաբանության, տեքստերի փոփոխություն ես չէի նշմարում››,-ասաց ԼՀԿ պատգամավորը:

Նրա խոսքով 2019թ-ին ապրիլին Լեհաստանի նախագահը տարածաշրջանային այց պետք է կատարեր Հարավային Կովկաս, սակայն ստացվեց այնպես, որ նա միայն Ադրբեջան այցելեց, Հայաստան չեկավ:

Բաբաջանյանը, անդրադառնալով Արևելյան հետազոտությունների, ուսումնասիրությունների կենտրոնում տեղի ունեցած հանդիպմանը, ասաց, որ այն նույնպես հիասթափեցնող էր:

‹‹Փորձագետները, որոնք մեզ հետ հանդիպում էին, մատնանշում էին փաստեր, որոնք ևս վկայում են ոչ պատշաճ աշխատանքի մասին Հայաստանի պատկան մարմինների, իշխանությունների կամ փորձագիտական շրջանակների կողմից: Տպավորություն կար, որ շատ հետևողական աշխատում են Քոչարյանին և Սերժ Սարգսյանին հավատարիմ շրջանակները: Նրանք տպավորություն ունեն, որ Քոչարյանն ու Սարգսյանը վերադառնալու հնարավորություն ունեն և Հայաստանում ամեն ինչ սպասման ռեժիմի մեջ է. Քոչարյանն ու Սարգսյանը կվերադառնան և ապա կայունություն կհաստատվի››,-ասաց Բաբաջանյանը, ապա ավելացրեց, որ իրենք ցրել են այդ տպավորությունները՝ հասկանալով, թե որտեղից են գալիս այդ հոսանքները:

Աղբյուր` Փաստինֆո