Փաստ ինֆո

‹‹Լուսավոր Հայաստան›› խմբակցության ղեկավար Էդմոն Մարուքյանը հայտարարել է, որ ‹‹Իմ քայլի›› հետ ունեցել են պայմանավորվածություն՝ եթե ԲԴԽ-ի անդամի երրորդ թեկնածուն եւս չլինի ընդդիմության կողմից, ապա իրենք դեմ են քվեարկելու՝  անկախ նրանից, թե նա ով է:

‹‹Մենք բանակցում էինք ԱԺ նախագահի և ‹‹Իմ քայլը›› խմբակցության ղեկավարի հետ , որպեսզի ԲԴԽ 3 թափուր տեղերից մեկը ընդդիմության կողմից ներկայացված լինի: Իրենք ասում էին՝ խնդիր չկա: Մենք մինչև պաշտոնական առաջադրումը ներկայացնում ենք թեկնածուներ , իրենք էլ ասում են, որ խնդիր ունեն, դեմ կլինի, ուրիշ մարդ փնտրեք››,-1in.am-ի հետ զրույցում ասել է Մարուքյանը` ընդգծելով, որ իշխանությունների ձևավորած  մթնոլորտի պատճառով բոլորը հրաժարվում են ընդդիմության կողմից ԲԴԽ թեկնածու առաջադրվել՝ ասելով, որ միևնույն է չեն ընտրվելու:

Հակառակ Մարուքյանի այս հայտարարությանը, երեկ ‹‹Փաստինֆո››-ի հետ զրույցում ‹‹Իմ քայլը›› խմբակցության պատգամավոր Գևորգ Պապոյանն ասել էր, որ իրենց համար անակնկալ էր ԼՀԿ-ի այն պատճառաբանությունը, որն, ըստ էության, հետևյալն էր.  ‹‹Ձեր թեկնածուն լավն է, սակայն, քանի որ մեր թեկնածուին մերժում եք, մենք էլ ձերին ենք մերժում››:

Այս դեպքում հարց է առաջանում՝ ինչպե՞ս կարող էր իշխանության համար անակնկալ լինել ԼՀԿ-ի դիրքորոշումը, եթե մինչ այդ հստակ պայմանավորվածություն է եղել:

Եթե ԼՀԿ ղեկավարի խոսքերը համապատասխանում են իրականությանը և ‹‹Իմ քայլն›› էլ իր թեկնածուին ԲԴԽ անդամ դարձնելու ցանկություն ուներ, ապա իշխանական պատգամավորներն ամենայն պատասխանատվությամբ պետք է մասնակցեին ընտրություններին ու ամեն գնով փորձեին լրացնել ընդդիմության կողմից չտրված ձայները:

Հատկանշական է, որ նույն հարցազրույցում Մարուքյանն ասել է՝ իշխանությունների կողմից ԲԴԽ երկրորդ թեկնածուին ներկայացնելիս իրենք հարցրել են՝ ինչ եղավ ընդդիմությունից ԲԴԽ անդամի թեկնածու առաջադրելու պատրաստակամությունը, իշխանություններն էլ ասել են՝ այդ 2 թեկնածուներին ընտրեք, երրորդին արդեն  ընդդիմությունը կներկայացնի:

Ստեղծված իրավիճակը պարզաբանելու համար ‹‹Փաստինֆո››-ն փորձեց կապ հաստատել իշխանական ‹‹Իմ քայլի›› պատգամավորների  հետ, սակայն նրանց հեռախոսներն անջատված էին կամ չէին պատասխանում: Միայն հնարավոր եղավ խոսել Սիսակ Գաբրիելյանի հետ, ով ասաց՝ տեղյակ չէ, թե ինչ պայմանավորվածության մասին է խոսքը, սակայն նշեց, որ, կարծես թե, ԲԴԽ անդամի թեկնածուի համար նույնպես անսպասելի էր ԼՀԿ-ի դեմ քվեարկելը, քանի որ ինքն ասում էր, որ հանդիպել է ԼՀԿ-ի հետ և որևէ մեկը բացասական չի արտահայտվել:

Անդրադառնալով ԼՀԿ-ի կողմից ներկայացված թեկնածուի չընտրելուն, Գաբրիելյանն ասաց, որ տվյալ անձն (ում անունը հայտնի չէ լրատվականներին) սահմանված  չափանիշներին տարիքային առումով համապատասխան չի եղել:

Հեղինակ` Սոնա Գեւորգյան