Փաստ ինֆո

Երևանի ընդհանուր իրավասության դատարանի Կենտրոն և Նորք Մարաշ նստավայրում դատավոր Տաթևիկ Գրիգորյանի նախագահությամբ քիչ առաջ մեկնարկեց կաշառքի մեջ մեղադրվող դատավոր Գագիկ Հեբոյանի և փաստաբան Վահագն Դանիելյանի գործով դատական նիստը։

Նշենք, որ սկզբնապես այն մակագրվել էր Կոտայքի մարզի դատավորներին, սակայն նրանք հրաժարվել էին քննել իրենց գործընկերոջ գործը և ինքնաբացարկ էին հայտնել։ Ավելի ուշ գործը մակագրվել էր Երևանի ընդհանուր իրավասության դատարանի դատավոր Տաթևիկ Գրիգորյանին, ով էլ գործուղվել էր Կոտայքի մարզի դատարան։ Հետագայում պարզ դարձավ, որ նա արտագնա նիստ է նշանակել Երևանում։

Նախորդ դատական նիստին սկսվել էր վկաների հարցաքննությունը, ինչն էլ այսօր շարունակվելու է։

«Փաստինֆո»-ի հաղորդմամբ՝ վկաներից առաջինն այսօր Լիլիթ Մանյանն է, ով փաստաբան է, աշխատում է դատարանի հարակից տարածքում գտնվող շենքում, որտեղ աշխատում է նաեւ գործով մեղադրյալ փաստաբան Վահագն Դանիելյանը։ Նշենք, որ Մանյանը նախկինում աշխատել է նաեւ Կոտայքի մարզի ընդհանուր իրավասության դատարանում, եւ իր խոսքով՝ գործով մեղադրյալ, դատավոր Հեբոյանի հետ ունի զուտ աշխատանքային հարաբերություններ։

Լիլիթ Մանյանը, դատարանի դահլիճում ցուցմունք տալով, նշեց, որ 2019 թվականի մարտի վերջին ինքը գրասենյակում էր Վահագն Դանիելյանի օգնականի հետ, երբ ընդմիջման ժամին մի անծանոթ տղամարդ բարձրացավ, հարցրեց Դանիելյանին, բայց նա տեղում չէր։ Երկու ժամ հետո իրեն զանգահարեց Հեբոյանը, ասաց՝ քաղաքացի կա, որ խորհրդատվության կարիք ունի, եւ երբ եկավ այդ տղամարդը, ինքը հիշեց, որ կեսօրին եկած նույն մարդն է․ «Ես գիտեի, թե եկել է խորհրդատվության, հարցրի՝ ի՞նչ խնդիր ունի, նա էլ ասաց՝ ես խնդիր չունեմ, ես գումար եմ բերել, որպեսզի փոխանցեմ Գագիկ Հեբոյանին։ Ես զարմացա, ասացի՝ գործ ունե՞ք դատարանում, ինքն ասաց՝ այո, բացեցի, կայքում նայեցի, աչքովս ընկավ թռչնաբուծարան բառը, ասաց՝ հա-հա, դա է,էլ չնայեցի մինչեւ վերջ։ Ինձ թվաց՝ պետական տուրքի գումար է ուզում վճարել, ես բացատրեցի,որ այդտեղ գումար չեն վճարում, պետք է գնա, բանկում վճարի, նա էլ ասաց, որ իրեն ասել են, որ պետք է բերի, տա Վահագին, ասացի, որ ոչ մի բանով չեմ կարող օգնել»։

Դատախազ Չախոյանը հարց ուղղեց վկային՝ արդյո՞ք իրեն կասկածելի չթվաց այն, որ իր մոտ մարդ են ուղարկում՝ խորհրդատվության, մինչդեռ վերջինս գումար է ուզում տալ։ Ի պատասխան հարցին՝ վկան ասաց, որ բացարձակ կասկածելի չի թվացել, որովհետեւ ինքը հստակ հասկացել է, թե այդ անձը պետտուրքի մասին է խոսում։ Հարցին՝ մի՞թե պետք է պետտուրք վճարվեր արտարժույթով (նշվեց, որ այդ անձի մոտ եղել է 2500 ԱՄՆ դոլար), վկան պատասխանեց՝ ասելով, որ եթե բանը հասներ դրան, ինքը կբացատրեր։

Վկան նշեց, որ իր ընկալմամբ՝ Վահագն Դանիելյանը չի ճանաչել այդ անձին՝ Բենիկ Հարությունյանին։ Վստահ չէ, բայց կարծում է, որ Վահագն Դանիելյանի օգնական Լիլիթ Եղիազարյանը եւս չի ճանաչել նրան։

Մեղադրյալ Հեբոյանի պաշտպան Նադիրյանը դիմեց վկային՝ հարցնելով՝ եթե իրականում կաշառք վերցնելու լիներ, արդյո՞ք այդ գործընթացը կվստահեր իրեն։ Ի պատասխան սրան՝ Լիլիթ Մանյանն ասաց, որ դա բացառում է․ «Ես Հեբոյանին ճանաչում եմ գրեթե քսան տարի, նախկինում էլ աշխատել ենք նույն դատարանում, եւ ես բացառում եմ, որ պարոն Հեբոյանը նման թեմայով մարդ ինձ մոտ ուղարկեր»։

Վկային հարց ուղղեց նաեւ նիստը նախագահող դատավորը՝ հետաքրքրվելով՝ արդյո՞ք ինքը նպատակահարմար չի գտել Հեբոյանի հետ այդ պահին խոսելու, երբ իր մոտ եկած անձի հետ քննարկել է ոչ թե իրավաբանական հարցեր, այլ գումար է ցանկացել տալ։ Ի պատասխան հարցին՝ վկան ասաց․ «Ես համոզված էի, որ խոսքը պետտուրքի մասին է, եւ կարիք չկար նրա հետ քննարկել, ես որեւէ արտառոց բան չգտա»։

Վկային դարձյալ հարց ուղղեց դատախազը՝ հետաքրքրվելով՝ արդյո՞ք համապատասխանում են իր նախաքննական ցուցմունքը ներկայիս ցուցմունքի հետ, եւ արդյո՞ք իրեն որեւէ մեկը ուղղորդել է։ Վկան նշեց, որ իրականությունն է հայտնել ինչպես նախկինում, այդպես էլ հիմա, իսկ ուղղորդում ոչ մեկի կողմից չի եղել։

Վկայի այս պատասխանի հետո դատախազ Չախոյանը միջնորդեց հրապարակել վկայի նախաքննական ցուցմունքը՝ պատճառաբանելով, որ երկու ցուցմունքներում առկա է հակասություն։ Մասնավորապես, ըստ դատախազի, վկան նախաքննական ցուցմունքում հայտնել է, որ այդ մարդը կասկածելի է թվացել իրեն, ընդհանրաես այդ երեւույթն է կասկածելի թվացել, ինչի մասին ինքը հայտնել է, ինչես Վահագին, այնպես էլ  նրա օգնական Լիլիթին։ Դատախազը նշեց նաե, որ վկան ասել է, թե դատավորը փրորձել է այդ գումարը իր միջոցով ստանալ։

Պաշտպանական կողմը առարկեց միջնորդության դեմ՝ նշելով, որ հակասություն չկա։

Նիստը նախագահող դատավոր Տաթեւիկ Գրիգորյանն արձանագրեց, որ առկա են էական հակասություններ, որովհետեւ նախաքննական ցուցմունքում նա նշել է, որ դեպքից հետո հասկացել է, թե Հեբոյանը այդ տղամարդուն իր մոտ ինչ նպատակով է ուղարկել, հասկացել է, որ նա չի ցանկացել իր ձեռքով վերցնել դա, եւ փորձել է իր միջոցով դա անել, մինչդեռ այստեղ տված ցուցմունքում առհասարակ բացառեց դա։

Այս պահին հրապարակվում է Լիլիթ Մանյանի նախաքննական ցուցմունքը։

Հեղինակ` Միլենա Խաչիկյան