Փաստ ինֆո

«Փաստինֆո»-ի հաղորդմամբ՝ Երեւանի ընդհանուր իրավասության դատարանում դատավոր Մնացական Մարտիրոսյանը  քիչ առաջ բավարարեց Մանվել Գրիգորյանի եւ նրա կնոջ՝ Նազիկ Ամիրյանի գործով մեղադրանքը պաշտպանող դատախազների միջնորդությունը՝ Մանվել Գրիգորյանի նկատմամբ միջգերատեսչական հանձնաժողովային դատաբժշկական նոր փորձաքննություն անցկացնելու մասին։

Դատավորը նշեց, որ դրա կատարումը հանձնարարվում է ՀՀ առողջապահության նախարարության համապատասխան փորձագիտական հանձնաժողովին։

Վերջինս պետք է պատասխանի հետեւյալ երեք հարցերին.  ի՞նչ հիվանդություններով է տառապում Մանվել Գրիգորյանը, դրանցից որեւէ մեկը տեսակով կամ ծանրության աստիճանով համապաստախանու՞մ է պատիժը կրելուն խոչընդոտող հիվանդություններին, եւ դրանց պատշաճ հսկողությունը հնարավո՞ր է իրականացնել ՔԿՀ-ում թե՞ ոչ։

Ինչ վերաբերում է պաշտպանների եւ դատախազների առաջադրած մյուս  հարցերին, ապա դրանք, որպես լրացուցիչ հարցեր, կարող են ներկայացվել համապատասխան հանձնաժողով։

Պաշտպանների առաջարկած փորձագետների մասնակցության հարցին էլ անդրադարձ կարվի փորձաքննություն նշանակելուց հետո՝ քննության ընթացքում։

Որոշման հրապարակումից հետո նիստը հետաձգվեց, քանի որ ամբաստանյալ Մանվել Գրիգորյանն այլեւս դատարանում չէր. բժիշկները զգուշացրել էին նրա՝ նիստի շարունակությանը մնալու անհնարության մասին։

Հաջորդ դատական նիստը նշանակվեց հուլիսի 9-ին ժ. 12։00-ին։

Նիստից հետո պաշտպաններից Լեւոն Բաղդասարյանը, անդրադառնալով խափանման միջոցի փոփոխման իրենց միջնորդության մերժմանը, լրագրողների հետ զրույցում այն գնահատեց ոչ իրավաչափ. «Իրավաչափ չէր այնքանով, որ տարբեր բժշկական կենտրոններ տվել էին իրենց եզրակացությունները այն մասին, որ անձի կյանքին վտանգ է սպառնում, եւ նման պայմաններում ստեղծել հանձնաժողով, որի աշխատանքը կարող է տեւել ամիսներ, եւ այդ ընթացքում անձին պահել կալանքի տակ, դասական խոշտանգում է»։

Բաղդասարյանը հայտնեց, որ այս որոշումը կբողոքարկվի ներպետական ատյաններում, ինչպես նաեւ կուղարկվի ՄԻԵԴ։

Հեղինակ` Միլենա Խաչիկյան