Փաստ ինֆո

«Փաստինֆո»-ի հաղորդմամբ՝ Վերաքննիչ քրեական դատարանում դատավոր Արմեն Դանիելյանի նախագահությամբ քիչ առաջ հրապարակվեց Ռոբերտ Քոչարյանի եւ մյուսների գործով բողոքների վերաբերյալ որոշումը։

Խորհրդակցական սենյակից վերադառնալով՝ դատավորը հայտնեց, որ բավարարում է դատախազ Պետրոսյանի, ինչպես նաեւ՝ տուժող Ավագյանի եւ վերջինիս ներկայացուցիչ Սաֆարյանի վերաքննիչ բողոքները. «Դատարանը որոշեց բեկանել մեղադրյալ Քոչարյանի նկատմամբ որպես խափանման միջոց ընտրված կալանավորման վերացման, փոփոխման կամ պահպանման մասին Երեւան քաղաքի ընդհանուր իրավասության դատարանի որոշումը՝ վերացնելով նրա նկատմամբ ընտրված անձնական երաշխավորություն խափանաման միջոցը, եւ որպես խափանման միջոց կիրառել կալանավորումը։»

Այսպիսով, Ռոբերտ Քոչարյանը դարձյալ կկալանավորվի։ Դատավորը հայտնեց, որ նրա կալանավորումը հանձնարարվում է ՀՀ ոստիկանության համապատասխան ստորաբաժանմանը։

Դատավորը բավարարեց նաեւ ներկայացված մյուս բողոքը՝ ՍԴ դիմելու եւ գործի վարույթը կասեցնելու մասին որոշման դեմ։ Այդպիսով, Վերաքննիչ դատարանը բեկանեց Երեւանի ընդհանուր իրավասության դատարանի՝ գործի վարույթը կասեցնելու եւ ՍԴ ուղարկելու մասին որոշումը, եւ որոշեց գործն ուղարկել նույն դատարան՝ նոր քննության։

Նշենք նաեւ, որ սույն որոշումները կարող են բողոքարկվել այն ստանալուց հետո՝ 15-օրյա ժամկետում։

Դատախազ Պետրոս Պետրոսյանը հայտնեց, որ այս պահին դատարանի որոշումը մեկնաբանել չեն կարող. «Պետք է ստանանք դատարանի որոշումը, որպեսզի ծանոթանանք պատճառաբանական մասին եւ կարողանանք համապատասխան եզրահանգում կատարել»,-լրագրողների հետ զրույցում ասաց նա։

Հիշեցնենք, որ նախորդ դատական նիստին՝ Դատախազության բողոքների ներկայացումից հետո, երբ մեկնարկեց առարկությունների փուլը, ելույթ ունեցան գործով մեղադրյալ Յուրի Խաչատուրովի պաշտպան Միհրան Պողոսյանը եւ Սեյրան Օհանյանի պաշտպան Կարեն Մեժլումյանը։ Դրանից հետո, երբ խոսքի իրավունքը տրվեց Ռոբերտ Քոչարյանի պաշտպաններին, Հովհաննես Խուդոյանը հայտարարեց, որ ցանկանում է ներկայացնել ավելի վաղ դատարանին տրամադրված իրենց միջնորդությունը, որով պաշտպանական կողմը ցանկանում էր գործի վարույթը կասեցնել եւ այն ուղարկել Սահմանադրական դատարան։

Դատախազներն ու տուժող կողմը առարկեցին պաշտպանական կողմի առաջարկած ձեւաչափին, ըստ որի՝ նախատեսվում էր լսել նախ այդ միջնորդությունը, ապա՝ նրանց առարկությունները։ Սրանից հետո դատավոր Դանիելյանը հայտարարեց, որ այսպիսով, ավարտվում է բողոքների քննությունը․ ‹‹Նկատի ունենալով, որ պաշտպանության կողմի դրսեւորած վարքագիծը ուղղված է դատական նիստի բնականոն ընթացքը խաթարելուն, դատական նիստը անհարկի ձգձգելուն, իրենց վերապահված իրավունքներից ըստ էության հրաժարվելուն, ելնելով արդարադատության արդյունավետության շահերից՝ դատական ստուգումը հայտարում եմ ավարտված»,-ասաց դատավորը։

Հիշեցնենք, որ Դատախազությունը բողոքարկել է Երևանի ընդհանուր իրավասության դատարանի դատավոր Դավիթ Գրիգորյանի՝ Ռոբերտ Քոչարյանի նկատմամբ ընտրված խափանման միջոց կալանավորման որոշումը փոփոխելու և քրեական գործի վարույթը կասեցնելու եւ Սահմանադրական դատարան դիմելու որոշումները:

Վերաքննիչ բողոքներ են ներկայացրել նաև տուժողների իրավահաջորդների նախկին ներկայացուցիչ Վահե Գրիգորյանը և տուժողի ներկայացուցիչ Սեդա Սաֆարյանը:

Հեղինակ` Միլենա Խաչիկյան