Փաստ ինֆո

«Շնորհավորում եմ դատավոր Դանիելյանին վեթթինգի մեկնարկը դեռ պաշտոնապես չտված՝ այն բարեհաջող անցնելու կապակցությամբ»,-«Փաստինֆո»-ի հետ զրույցում նման կարծիք հայտնեց «Մարտի 1»-ի գործով մեղադրյալ, ՊՆ նախկին նախարար Սեյրան Օհանյանի պաշտպան Կարեն Մեժլումյանը՝ անդրադառնալով Վերաքննիչ քրեական դատարանի դատավոր Արմեն Դանիելյանի նախագահությամբ այսօր կայացված որոշմանը. «Եթե գործն իր մոտ էր, այս որոշումը բնականաբար սպասելի էր եւ բխում էր, այսպես ասած, անցումային շրջանի «իրավունքից». ես սա ասում եմ ՍԴ դիմելու որոշումը վերացնելու մասով»,-ասաց նա։

Հարցին, թե այս որոշումը ինչպես կարող է անդրադառնալ ՍԴ-ում գործի քննության ընթացակարգերի վրա, Կարեն Մեժլումյանը պատասխանեց. «Ես արդեն չեմ պատկերացնում, որովհետեւ մի կողմից դատարանի որոշումը առիթ է ՍԴ վարույթը սկսելու, մյուս կողմից այդ որոշումը վերացվել է, հիմա ՍԴ-ն պետք է դադարեցնի՞, թե՞ պետք է սպասի Վճռաբեկ բողոք բերվի. գուցե Վճռաբեկն էլ Վերաքննիչի որոշումն է վերացնում»։

Կարեն Մեժլումյանի գնահատմամբ՝ ստեղծված իրավիճակը ՍԴ-ի մեկնաբանման տիրույթում է. «Նախկինում չի եղել իրավիճակ, որ, օրինակ, Հանրապետության նախագահի վերաբերյալ գործ քննվի, եւ նրա փաստաբաններին թույլ չտան բողոքների վերաբերյալ բացատրություններ տալ»։

Մեժլումյանի կարծիքով՝ դա հեղափոխական շահերով կամ իրավունքով չի կարող արդարացվել. «Երբ ես մասնակցում էի հեղափոխության իրականացմանը, մասնակցում էի նրա համար, որ ազատվենք դատավոր Արմեն Դանիելյանի պես դատավորներից եւ ունենանք այնպիսի դատավորներ, ինչպիսիք են Ազարյանը, Պապոյանը, Ռշտունին, Հարությունյանը, այսինքն՝ այնպիսի դատավորներ, որոնք օբյեկտիվ են, եւ փաստաբանները կուզեն, որ իրենց գործերը նրանց մակագրվեն, հիմա եկել է մի վիճակ, երբ այս անցումային ժամանակներում այդ դատավորները թիրախավորվել են, իսկ Արմեն Դանիելյանին որոշները ծափ տվեցին, եւ նա վեթթինգն «անցավ»։ Մի տեսակ արժեքային համակարգն է կարծես փոխվել, այդ առումով ես ցավ եմ ապրում»։

Կարեն Մեժլումյանի խոսքով՝ այս որոշումն ինքնին ինքնաբացարկի հիմք չի կարող հանդիսանալ Ընդհանուր իրավասության դատարանի դատավոր Դավիթ Գրիգորյանի համար. «Ես որքանով լսեցի Վերաքննիչի որոշումը, դա այնպիսինն էր, որ չէր կարող 299-րդ հոդվածի շրջանակում կայացվել, կարծես թե ուղարկեց նոր քննության, այսինքն՝ նա պետք է ընդուներ 292-րդ հոդվածով սահմանված որոշումներից մեկը, որի իրավունքը եւս չուներ»։

Պաշտպանի խոսքով՝ կազուսային վիճակ է ստեղծվել. «Փաստորեն, այս որոշումը կբողոքարկվի Վճռաբեկ, հետո նորից ՍԴ կգնա,  որովհետեւ ոնց որ թե Վճռաբեկն էլ հետեւողականություն չի ցուցաբերում իրավունքի հարցերում, այլ նպատակահարմարության անհրաժեշտությունից ելնելով է որոշումներ կայացնում, իսկ ես կուզեի իրավունքի դաշտում այդ որոշումները տեսնեի»,-«Փաստինֆո»-ի հետ զրույցում այս մասին ասած Կարեն Մեժլումյանը։

Հեղինակ` Միլենա Խաչիկյան