Փաստ ինֆո

Թբիլիսիում բողոքի ցույցերը չեն դադարեցվի, մինչև Վրաստանի ներքին գործերի նախարար Գեորգի Գախարիայի հրաժարականը և ընտրական համակարգi փոփոխումը: Այս մասին հայտարարել է «Վրացական երազանք» կառավարող կուսակցության նախկին միջազգային քարտուղար Արմազ Ախվլեդիանին:

Նրա կարծիքով, վրացական իշխանությունները ներկայումս ապակողմնորոշված և վախեցած են, հետևաբար` կհամաձայնեն կատարել ցուցարարների ուլտիմատումը: «Դա անպայման տեղի կունենա, եթե ոչ այսօր, ապա առաջիկա օրերին», - ասել էԱխվլեդիանին:

Բողոքի մասնակիցները սուլոցներով են արձագանքել վրացի էմիգրանտներից մեկի կոչին՝ նախկին նախագահ Միխայիլ Սահակաշվիլիին Վրաստան վերադարձնելու վերաբերյալ, ինչպես նաև Սահակաշվիլիի «Միասնական ազգային շարժում» կուսակցության ելույթներին: Այլ ընդդիմադիր քաղաքական գործիչների խոսքը նույնպես ուղեկցվել է սուլոցներով և աղաղակներով:

Վերջին մեկ ժամվա ընթացքում ցուցարարների թիվը զգալիորեն նվազել է: Ավելի վաղ հաղորդվել էր, որ հունիսի 22-ի երեկոյան մոտ երեք հազար մարդ էր հավաքվել Թբիլիսիի խորհրդարանի շենքի առջև:

Մասնակիցները  ցույցն ավարտել են երթով դեպի «Վրացական երազանք»  իշխող կուսակցության կենտրոնական գրասենյակը` Վրաստանի իշխանություններին իրենց պահանջների մասին հիշեցնելու համար: Ցուցարարների ձեռքերում էր «Գախարիա, հեռացիր» գրառումով մեծ պաստառը:

Նրանք խոստացել են, որ երթը լինելու է խաղաղ և կոչ են արել ոստիկանությանը վերահսկել մասնակիցների անվտանգությունը: Ոստիկանությունը ուղեկցել է երթը ոչ մեծ հեռավորության վրա:

Ակցիայի կազմակերպիչները կոչ են  արել ներկաներին կրկին հանդիպել խորհրդարանի առջև կիրակի օրը տեղի ժամանակով ժամը 19:00-ին:

Թբիլիսիում մայիսի 20-ից անցկացվում են հակառուսաստանյան բողոքի ակցիաներ:

Աղբյուր` Փաստինֆո