Փաստ ինֆո

Վճռաբեկ դատարանը վարույթ չի ընդունել ՀՀ նախկին փոխվարչապետ Արմեն Գեւորգյանի խափանման միջոցի գործով Դատախազության եւ պաշտպանական կողմի ներկայացրած բողոքները: Այս մասին «Փաստինֆո»-ն տեղեկացավ Գեւորգյանի պաշտպան Էրիկ Ալեքսանյանից:

Վերջինս նշեց, որ ըստ Վճռաբեկ դատարանի՝ վարույթ ընդունելու օրենքով սահմանված հիմքերը առկա չեն եղել:

Հիշեցնենք, որ Դատախազությունը բողոքարկել էր Արմեն Գեւորգյանին չկալանավորելու Վերաքննիչ դատարանի որոշումը, իսկ պաշտպանական կողմը Վճռաբեկ դատարանում վիճարկում էր Գեւորգյանին մեղսագրվող արարաքներից մեկով՝ փողերի լվացման դրվագով հիմնավոր կասկածի առկայությունը. «Մենք վիճարկում էինք հիմնավոր կասկածը՝ փողերի լվացման մասով, մնացած առումով դատական ակտի հետ միանշանակ համաձայն ենք»,- մեզ հետ զրույցում ասաց պաշտպանը:

Նշենք, որ խոսքը վերաբերում է  Առաջին ատյանի այն որոշմանը, ըստ որի՝ Գեւորգյանին մեղսագրվող փողերի լվացման դրվագով առկա է հիմնավոր կասկած, սակայն նրան կալանավորելու հիմքեր չկան: Վերաքննիչ դատարանը այս հիմքով պաշտպանի ներկայացրած բողոքը մերժել էր՝ ուժի մեջ թողնելով Առաջին ատյանի դատարանի որոշումը:

Արմեն Գեւորգյանը մեղադրվում է ՀՀ քրեական օրենսգրքի 38-300.1-րդ հոդվածի 1-ին մասով, 311-րդ հոդվածի 4-րդ մասի 2-րդ կետով եւ 190-րդ հոդվածի 3-րդ մասի 1-ին կետով` ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու եւ հանցավոր ճանապարհով ստացված գույքն օրինականացնելու մեջ:

Նրա նկատմամբ որպես խափանման միջոց է ընտրված ստորագրությունը` չհեռանալու մասին:

Հեղինակ` Միլենա Խաչիկյան