Փաստ ինֆո

ԱԱԾ տնօրեն Արթուր Վանեցյանն այսօր Ազգային ժողովում պատասխանելով «Լուսավոր Հայաստան» խմբակցության պատգամավոր Մանե Թանդիլյանի հարցին, թե ԱԱԾ-ՀՔԾ հայտնի գաղտալսումից հետո ինչ քայլեր են իրականացվել նմանատիպ դեպքերից խուսափելու համար, հայտարարել է, որ գործարկվել է հայկական արտադրության մի հավելված, որը զերծ է պահում ամեն տեսակ գաղտալսումներից. «Մինչ այդ հայտնի գաղտալսումների ի հայտ գալը ԱԱԾ-ն տեղի ՏՏ մասնագետների հետ սկսել էր մշակել մի ծրագիր, որը պետք է կիրառվեր եւ զերծ պահեր մեզ ցանկացած տիպի գաղտալսումից: Այն այսօր կա, գործում է, իմ հեռախոսում տեղադրված է դեռեւս թեստային տարբերակը, եւ ստուգվում են բոլոր տեսակի խոցելիությունները: Կարող եմ ասել, որ այս պահին բավականին պաշտպաննված է, եւ բազում մասնագետներ արդեն իսկ տվել են եզրակացսություն, որ գրեթե անհնար է այդ հավելվածի գաղտալսումը»:

Արթուր Վանեցյանն ասել է նաեւ, որ եթե դա արդարացնի իրեն, պետք է որոշվի պետական այն պաշտոնյաների խումբը, որ պետք է օգտվի այդ հավելվածից.

«Այն լրիվ հայկական պրոդուկտ է, սերվերը ֆիզիկապես գտնվում է ԱԱԾ շենքում, գաղտագրվում է ամբողջությամբ, անգամ, եթե մենք ուզենանք գաղտալսել մեզ, անհնարին կլինի: Այդ տիպի մի հավելված ունենք»:

Արթուր Վանեցյանն ընդգծել է, որ ամեն դեպքում, ժամանակակից աշխարհում հեռախոսային խոսակցությունների գաղտնիության ապահովումը հարյուր տոկոսով գրեթե անհնար է. «Հայտնի են հարյուրավոր դեպքեր, երբ գաղտնալսվել են շատ-շատ երկրների առաջնորդներ, պետական գործիչներ, քաղաքական գործիչներ, եւ հավատացեք, հազարավոր այդպիսի դեպքերի մասին չեն էլ բարձրաձայնել»:

Թե ինչ փուլում է իր եւ Սասուն Խաչատրյանի գաղտալսման դեպքի առթիվ հարուցված քրեական գործը, Արթուր Վանեցյանը չնշեց. «Ես զերծ կմնամ որեւէ մեկնաբանությունից, որովհետեւ այն քննվում է Քննչական կոմիտեում, եւ հարցերի դեպքում կարող եք դիմել իրենց»:

Աղբյուր` Փաստինֆո