Փաստ ինֆո

«Գումարների տրամադրման տրամաբանությունը շատ սխալ է ընտրված»,- «Փաստինֆո»-ի հաղորդմամբ` այսօր այս մասին «Հայացք» մամուլի ակումբում հայտարարեց ՀՀ պահեստազորի սպա Կարեն Հակոբյանը` անդրադառնալով պահեստազորային սպաների բնակարանային ապահովման ընթացակարգում կատարված փոփոխություններին:

Արդեն հայտնել ենք, որ նոր կառավարության թիվ 540 որոշմամբ` փոփոխություններ եւ լրացումներ են կատարվել 2007 թվականի թիվ 384 որոշման  մեջ, որով առաջարկվում է նախկին կարգավորմամբ բնակարան տրամադրելու փոխարեն մարզերում կամ գյուղական համայնքներում  այդ կատեգորիային բավարարող սպաներին տրամադրել դրամական միջոցներ՝ բնակարաններն ապահովելու 90, իսկ Երեւան քաղաքում՝ 50 տոկոսով։

Ի պատասխան «Փաստինֆո»-ի այն հարցին, թե տոկոսային այդ հարաբերակցությունը ինչի հիման վրա է կատարվել, ՀՀ պահեստազորի սպա Կարեն Հակոբյանը նշեց. «Մի անգամ ՊՆ նախարարը հայտարարեց, որ կարելի է Երեւանը բեռնափաթել, մարդիկ գնան, մարզերում բնակվեն. միգուցե դա է իրենց տրամաբանությունը»:

Կարեն Հակոբյանի խոսքով` իրենք այս թեմայի շուրջ բանակցությունների մեջ են դեռեւս սեպտեմբեր ամսից. «Մեր առաջին հանդիպմանը վարչապետը խնդիր դրեց, որ գումար հատկացնելու որոշում կայացնելու համար աշխատի հանձնաժողով, որում ընդգրկված կլինի մեզնից մի հոգի, սակայն երբ 40-50 օր հետո հանդիպեցինք փոխնախարար Բալայանի հետ, իմ առաջին հարցը եղավ այն, թե ինչու մեզ հանձնաժողովի մեջ չեն ընդգրկում, փոխնախարարն էլ ասաց, որ ինքը նպխատակահարմար չի գտնում»:

Հակոբյանի խոսքով` երբ երկրորդ անգամ հանդիպեցին վարչապետին, նրան ասացին այդ մասին, նա էլ հայտնեց, որ հանձնաժողով չի աշխատել, եւ այդ գումարի չափը որոշվել է անվտանգության նիստի ժամանակ. «Այդ հանդիպմանը նա նորից խնդիր է դնում, որ որոշման կազմակերպման գործում մենք եւս ներգրավված լինենք ու մեր մտահոգությունները առաջարկենք»:

Մայիսի 10-ին` որոշման ընդունման օրը, սպաները հանդիպեցին ընդունարանի պետի եւ վարչապետի օգնականի հետ եւ բարձրաձայնեցին իրենց հուզող պրոբլեմատիկ հարցերը. «Մենք 50-ից ավել առաջարկություններ ենք գրել, սակայն դրանք չեն ընդունվել»:

Կարեն Հակոբյանը մանրամասնեց` այս պահին 4000 հոգի հերթագրված սպաներ կան, որոնց մեջ եւ զինծառայողներ են, եւ զինթոշակառուներ են, շատերի տարիքն էլ արդեն լրացել է, նրանք կարող են ազատվել եւ այդպիսով դառնալ այս որոշման շահառու. «Այդ ժամանակ կառավարության հատկացրած 5.7 միլիարդ դոլարը չի հերիքելու, որովհետեւ առաջնահերթությունը տրվելու է այդ զինթոշակառուներին»:

Հակոբյանի խոսքով` առաջնահերթություն տրվում է նաեւ սահմանամերձ բնակավայրերում ապրող սպաներին. «Այսինքն` կամ զինթոշակառուն, կամ սահմանամերձի բնակիչը հերթից անկախ առաջ է անցնելու, իսկ Երեւանի հարցն էլի մնալու է: Մեզ ասում են` չե՞ք ուզում` մարզերի խնդիրները լուծենք, մենք ասում ենք` ոչ, ուզում ենք, որ բոլորի խնդիրները ճիշտ լուծեք»:

Սպայի խոսքով` մարդկանց հերթագրում են՝ ընտանիքի կազմին համապատասխան. «Այսինքն՝ եթե դու շահառու ես 2 սենյականոց բնակարանի, դրա գումարն է տրամադրվում, բայց դրա մեջ դեռ 10-15 հզ դոլար պիտի ներդնես, որ այդ տունը դառնա տուն, իսկ մինչ այս 1500 հոգու պատրաստի բնակարաններ են տրվել»:

Հանդիպման վերջում փաստաբան Նորայր Նորիկանը նշեց, որ 50-ից ավել հայցադիմումներ են ներկայացվել ՀՀ վարչական դատարան ընդդեմ  ՀՀ ՊՆ-ի` սեփականության իրավունքով հայցվորներին պետական բյուջեից բնակարան հատկացնելու կամ համարժեք ֆինանսական միջոցներ տրամադրելու պահանջով. «Նշանակվել են դատական նիստեր, որ սկսվելու են հունիսի 1-ից. տեսնենք` դատական համակարգն ինչպես կարձագանքի դրան»,-ասաց փաստաբանը:

Հեղինակ` Միլենա Խաչիկյան