Փաստ ինֆո

Երեւանի քաղաքապետարանը նախապես ծանուցում չի ստացել այսօր վաղ առավոտից մայրաքաղաքում կազմակերպված բողոքի ակցիաների մասին։ Այս մասին «Փաստինֆո»-ի թղթակցի հարցին ի պատասխան հայտնեցին Երեւանի քաղաքապետարանից։

Նշենք, որ «Հավաքների ազատության մասին» ՀՀ օրենքի 9-րդ հոդվածի համաձայն՝ Հանրային հավաք անցկացնելու համար կազմակերպիչը գրավոր իրազեկում է լիազոր մարմնին, բացառությամբ մինչև 100 մասնակից ունեցող, շտապ և ինքնաբուխ հավաքների։

Տվյալ պարագայում խոսքը չի կարող գնալ ինքնաբուխ կամ շտապ, առավել եւս 100 մասնակցի մասին, քանի որ այն զանգվածային բնույթ է կրում՝ ներառելով ամբողջ Երեւանը,ինքնաբուխ չէ՝ կազմակերպվել է վարչապետի կողմից։

Հոդված 10-ի համաձայն՝ Իրազեկման նպատակը պետության կողմից հավաքի բնականոն և խաղաղ ընթացքն ապահովելն է, ինչպես նաև այլ անձանց հիմնական իրավունքների ու հանրության շահերի պաշտպանության համար անհրաժեշտ միջոցներ ձեռնարկելը։

Հոդված 11-ի համաձայն՝ իրազեկումը քննարկող և որոշում կայացնողը համայնքի ղեկավարն է (այսուհետ` լիազոր մարմին): Լիազոր մարմնի որոշմամբ իրազեկումը կարող է քննարկել և դրա վերաբերյալ որոշում կայացնել նրա լիազորած անձը։

Այլ խոսքով՝ վարչապետն իրեն է վերագրել Երեւանի քաղաքապետարանի գործառույթները։

Հոդված 12-ի համաձայն՝ իրազեկումը կարող է ներկայացվել հավաքի անցկացման օրվանից ոչ ուշ, քան 7 օր, և ոչ շուտ, քան 30 օր առաջ, իսկ հոդված 13-ը պարտադիր է համարում գրավոր ներկայացնելը։

Հոդված 16-ի համաձայն՝ եթե իրազեկումը ներկայացվել է հավաքի անցկացման օրվան նախորդող 30 օրից մինչև 14 օր առաջ, ապա լիազոր մարմինն իրազեկումը քննարկում է այն մուտքագրվելու պահից 5 օրվա ընթացքում, իսկ եթե իրազեկումը ներկայացվել է հավաքի անցկացման օրվան նախորդող 13 օրից մինչև 7 օր առաջ, ապա լիազոր մարմինը իրազեկումը քննարկում է այն մուտքագրվելու պահից 48 ժամվա ընթացքում: Եթե քննարկման ժամկետն ավարտվում է ոչ աշխատանքային օրը, ապա դա երկարաձգվում է մինչև հաջորդ աշխատանքային օրվա ավարտը: Լիազոր մարմինը իրազեկումը մուտքագրելուց հետո այն անհապաղ ուղարկում է ոստիկանություն` հավաքի անցկացման վերաբերյալ կարծիք ստանալու նպատակով։

ՀՀ ոստիկանությունից «Փաստինֆո»-ի հարցմանն ի պատասխան հայտնել են, որ հավաքների ժամանակ հասարակական կարգը պահպանելու վերաբերյալ տեղական ինքնակառավարման մարմիններից ծանուցում չեն ստացել.«Վարչապետի խոսքը լսե՞լ եք, նա իր խոսքով հանձնարարել է»,- ասացին ոստիկանությունից։

Ինչպես վերեւում արդեն նշել ենք՝ հավաքներն արտոնել-չարտոնելու վերաբերյալ որոշում կայացնելու իրավասությունը վերապահված է լիազոր մարմնին, տվյալ պարագայում Երեւանի քաղաքապետարանին։

Այլ խոսքով՝ ՀՀ վարչապետը յուրացրել է Երեւանի քաղաքապետարանի գործառույթները։

Հոդված 19-ն արգելում է հավաքների անցկացումը, եթե`

1) հավաքի նպատակը սահմանադրական կարգի բռնի տապալումը, ազգային, ռասայական, կրոնական ատելություն բորբոքելը, բռնություն կամ պատերազմ քարոզելն է.

2) անձը, սույն օրենքի համաձայն, չունի հավաք կազմակերպելու իրավունք.

3) հավաքն անցկացվելու է Հանրապետության Նախագահի, Ազգային ժողովի, կառավարության նստավայրերից, դատարաններից կամ քրեակատարողական հիմնարկներից այնպիսի հեռավորության վրա, որի դեպքում այն սպառնում է դրանց բնականոն գործունեությանը.

4) հավաքն անցկացվելու է «Հայաստանի ատոմային էլեկտրակայան» ՓԲԸ-ից կամ գազի ստորգետնյա պահեստարաններից կամ դրանց սպասարկման կառույցներից կամ «Օրբիտա 2» վերգետնյա արբանյակային կայանից այնպիսի հեռավորության վրա, որը սպառնում է դրանց անվտանգությանը։

Աղբյուր` Փաստինֆո