Փաստ ինֆո

Արդեն 30 տարի է Հայաստանի Հանապետությունը վարում է քաոսային արտաքին քաղաքականություն, որը հիմնված չէ կոնկրետ փաստաթղթի կամ հայեցակարգի վրա:

Այսօր լրագրողների հետ զրույցում ասաց նորաստեղծ ‹‹Մեկ Հայաստան›› կուսակցության նախաձեռնող խմբի անդամ Արթուր Ղազինյանը:

Նա նշեց, որ արտաքին քաղաքականության ոլորտում Հայաստանը չի կարողացել ձևավորել երկարաժամկետ ռազմավարություն, քանի որ քաղաքականությունը մշակվել է օրվա և պահի իրավիճակով:

‹‹Ուսումնասիրելով և վերլուծելով Հայաստանի արտաքին հնարավորությունները ես աշխարհաքաղաքական իմաստով հայ-ռուսական հարաբերություններին այլընտրանք չունեմ: Քաղաքակրթական իմաստով մենք ունենք հսկայական ներուժ Եվրոպական Միրության, ԱՄՆ-ի հետ համագործակցություն զարգացնելու համար››,-ասաց ‹‹Մեկ Հայաստան›› կուսակցության նախաձեռնող խմբի անդամը
Ղազինյանի խոսքով, պետք է հստակ տարանջատել աշխարհաքաղաքական շահն ու քաղաքակրթական կողմնորոշումը:

‹‹Քաղաքակթական առումով ես միշտ կողմնակից եմ եղել եվրոպական հասարակարգին, մեզ համարելով եվրոպական քաղաքակրթության ակունքներում կանգանած ժողովուրդ››,-ասաց նա:
Անդրադառնալով ՀՀ վարչապետ Նիկոլ Փաշինյանի հրապարակած նոր Հայաստանի մասին 100 փաստերին, Ղազինյանն ասաց, որ եթե իրականում առաջընթաց լիներ՝ այդ 100 փաստը հրապարակելու կարիք չէր լինի:

‹‹Եթե ամեն ինչ նորմալ է, մարդիկ զգում են՝ բարեփոխումներ կան, երկիրը ընթանում է առաջ, ապա ի՞նչ կարիք կա 3-4 ժամ տևողությամբ ներկայացնել 100 փաստեր: Ես չեմ ցանկանա գնահատական տալ դրանց, թող այդ գնահատականը տան ՀՀ քաղաքացիները, թե ինչ է փոխվել իրենց կյանում››,-ասաց Ղազինյանը:

Լրագրողի հարցին, թե ներկա իշխանության ո՞ր քայլերին է իրենց ընդդիմադիր կուսակցությունը դեմ, նորաստեղծ կուսակցության նախաձեռնող խմբի անդամը պատասխանեց.

‹‹Որպեսզի հասկանանք, թե ինչին ենք դեմ, նախ պետք է հասկանանք, թե ինչ քաղաքականություն է վարում այսօրվա իշխանությունը: Այս պահին ես նկատում եմ մեկ քաղաքականություն, որ դա ներկայի ու անցյալի միջև շարունակական, արդեն ավանդական դարձած պայքարն է››:

Ղազինյանն ընդգծեց, որ այդ պայքարով փորձ է արվում ծածկել ներկա և ապագա օրակարգի բացակայությունն ու դրա ձևավորման հնարավորությունը:

Աղբյուր` Փաստինֆո