Փաստ ինֆո

Քաղաքացու օրվան նվիրված տոնի միջոցառումների կազմակերպման համար նախատեսված 124մլն-ից  83 մլն-ը, ինչպես արդեն տեղեկացրել ենք,  հատկացվել է մարզերում կազմակերպչական աշխատանք իրականացնող ընկերություններին և անհատ ձեռներեցներին։

«Փաստինֆո»-ի փոխանցմամբ մոտ 17 մլն դրամի պայմանագիր կնքվել է «Ex production» (Գևորգ Աղաբալյան Ա/Ձ)-ի հետ, որը միջոցառումների կազմակերպմամբ է զբաղվել  Սյունիքի և Վայոց ձորի մարզերում։ Ի դեպ պետռեգիստրում այս և մյուս անհատ ձեռներեցների մասին որևէ տվյալ հասանելի չէ։ Այդ անհատ ձեռներեցների շարքում են «Արտյոմ Զաքարյան» Ա/Ձ-ն, որն ըստ կառավարության մեզ տրամադրած տվյալների՝ կազմակերպչական աշխատանքով է զբաղվել  Գեղարքունիքի մարզում, ինչի համար ստացել է 8 մլն դրամ։ Սակայն «Unity production» («Ալեքսանդր Մհերյան»Ա/Ձ)-ի ֆեյսբուքյան էջից տեղեկացանք, որ վերջինս է իրականացրել ինչպես Գեղարքունիքի, այնպես էլ Կոտայքի մարզերում  միջոցառումների կազմակերպումը։ «Unity production»-ի մասին տվյալներ նույնպես չկարողացանք գտնել պետռեգիստրում, սակայն նրանց պաշտոնական կայքէջի տվյալները փաստում են, որ տարատեսակ միջոցառումների կազմակերպչական աշխատանքով  զբաղվող ընկերությունն իր գործունեությունը սկսել է դեռ 2013 թ.-ին և հիմնադիրներն են Ալեքսանդր Մհերյանն ու Անդրե Սիմոնյանը։

Թե երբ են սկսել իրենց գործունեությունը ծավալել մյուս ընկերությունները, և ովքեր են հանդիսանում դրանց  հիմնադիրները, նույնպես փորձեցինք պարզել  պետռեգիստրի կայքից։ Արմավիրի մարզում կապալառուական աշխատանք է ծավալել 2002 թվականից գործող «Շարմ հոլդինգ»-ը, որին տրամադրվել է 8.3 մլն։ «Շարմ հոլդինգ»-գործող հիմնադիրներն են Հրանտ Թոխատյանը և Ռուբեն Ջաղինյանը։ 2013 թ.-ից միջոցառումների կազմակերպմամբ է սկսել զբաղվել Նարեկ Չախոյանի և Թորգոմ Մարտիրոսյանի հիմնած «Թի էն սաունդ» ընկերությունը, որին տրամադրվել է 8 մլն։ Լոռու մարզում տոնակատարության կազմակերպումը կառավարությունը վստահել էր «Մալինա» սահմանափակ պատասխանատվությամբ ընկերությանը, որի ստեղծվել է 2018 թվականի վերջին՝ Գևորգ Թումաղայանի կողմից՝ հատկացնելով 8 մլն դրամ, իսկ Տավուշում միջոցառումների կազմակերումն ստանձնած «Հեփի իվենտ» ընկերությունն ստեղծվել 2014 թ.-ին։ Վերջինիս հիմնադիրներն են Բերտա Մելիքյանը և Ալիսա Ռուբինյանը։ Արագածոտնի մարզում էլ տոնական տրամադրություն ստեղծելու համար 8.5 մլն է ստացել Տիգրան Գրիգորյանին պատկանող «Օվացիա պրոդյուսերական կենտրոն»-ը, որն ըստ պետռեգիստրի տվյալների՝ իր աշխատանքները սկսել է 2003 թվականից։

Ինչպես ավելի վաղ նշել էինք, Երևանում տոնին նվիրված միջոցառումների կազմակերպիչը  երկու տարի առաջ ստեղծված «Ֆակտորի Փրոդաքշն»-ն է, որի հիմնադիրներն են Վազգեն Պողոսյանը, Ռուդիկ Տեր-Գալստյանը։

Հատկանշական է, որ «Փաստինֆո»-ի գրավոր հարցմանը պատասխանելիս կառավարությունը չէր նշել, թե ընկերություններից յուրաքանչյուրն ինչ ուղղությամբ է օգտագործել նշված գումարը, քանի որ գումարի մի մասը՝ մոտ 16 մլն դրամը տրամադրվել է այլ քարոզչական, կազմակերպչական աշխաատանքների կազմակերպման համար։

«Փաստինֆո»-ն կշարունակի անդրադառնալ թեմային և պարզել՝ որքանով են նպատակային օգտագործվել տոնի համար նախատեսված գումարները։

Աղբյուր` Փաստինֆո