Փաստ ինֆո

«Շեշտադրումը, թե 2008 թվականին սահմանադրական կարգը տապալելը քրեականացված չի եղել, տեղին չէ, որովհետեւ դրան ուղղված գործողությունները նախատեսված են եղել որպես քրեորեն պատժելի արարքներ»,-«Փաստինֆո»-ի հաղորդմամբ` դատարանի դահլիճում հայտարարեց դատախազ Կարեն Բիշարյանը. «Ընդամենը 300-րդ հոդվածով նախատեսված մի արարք առանձին հոդվածով է ներկայացվել, սա իրավական տեխնիկական հարց է»:

Կարեն Բիշարյանի խոսքով` հասկանալու համար` արդյո՞ք Ռոբերտ Քոչարյանը անձեռնմխելի է թե ոչ, պետք է դիտարկել նրան մեղսագրվող արարքները. «Արդյոք այն արարքը, որի համար մեղադրանք է առաջադրվել Քոչարյանին եւ որը նախատեսված է 300.1 հոդվածով, քրեականացված եղել է արարքի կատարման պահին գործով օրենսգրքով, այսինքն` փետրվարի 23-ից մարտի 20-ը ընկած հատվածում»: Նրա խոսքով` այդ հարցի պատասխանը հստակ է. «Այդ ժամանակահատվածում գործող քրեական օրենսգրքով հիշյալ հոդվածը նախատեսել է մի քանի արարքներ, եւ դրանց բովանդակությունից ակնհայտ է, որ դրանք որոշակի առանձին դերակատարում ունեն, քանի որ «կամ» շաղկապով առանձնացված են»:

Դատախազը պնդեց` փորձ է արվել տպավորություն ստեղծել, թե անձեռնմխելիության հետ կապված իրավական լուրջ խնդիր ունենք, եւ իբր Վճռաբեկ դատարանը լուրջ լուծում չի տվել. «Սակայն Վճռաբեկ դատարանի իրավական դիրքորոշումը հստակ է, չափորոշիչները հետեւյալն են. արդյոք անձը գործել է իր կարգավիճակից բխող հանրային շահին ուղղված դրդապատճառներից ելնելով, եւ արդյոք նրան մեղսագրվող գործողությունները կատարել է իր լիազորությունների սահմաններում»:

Դատախազի խոսքով` այս երկու չափորոշիչների  վերաբերյալ փաստական տվյալներ գործում կան, եւ դրանք վկայում են, որ Ռոբերտ Քոչարյանը չի կատարել իր կարգավիճակից բխող գործողություններ. «Դա վկայող օրինակ է այն, որ նա գործել է անձնական դրդումներով, այն է` ձեռնարկել է քայլել ցանկալի իշխանական համակարգը պահելու եւ իշխանությունը իր մտերիմ Սերժ Սարգսյանին փոխանցելու»:

Դատախազն անդրադարձավ մեկ այլ հանգամանքի եւս. «Այն, որ նախագահը բարձրաստիճան զինվորականներին հավաքել է որպես ՀՀ նախագահ եւ խորհրդակցություն արել, դեռ բավարար հիմք չէ ենթադրելու, թե դրանից հետո կատարվածը գտնվել է նրա լիազորությունների շրջանակում, եւ ավելին, հենց ադ օրվանից սկսած են նրան մեղսագրվել արարքներ, որ բանակը ապօրինի ներգրավվել է քաղաքական գործընթացներին»;

Հեղինակ` Միլենա Խաչիկյան