Փաստ ինֆո

Վերջին մի քանի շաբաթների ընթացքում խստացված ստուգում են ոչ միայն Ազգային ժողով ավտոմեքենաներով մուտք գործող ԱԺ տեղակալներին, հանձնաժողովների նախագահների տեղակալներին, այլև այն պատգամավորներին, ովքեր մեքենայով չեն մուտք գործում: Այսօր լրագրողների հետ զրույցում ասաց ‹‹Բարգավաճ Հայաստան›› խմբակցության պատգամավոր, Գագիկ Ծառուկյանի խոսնակ Իվետա Տոնոյանը:

Նա նշեց, որ չի ցանկանում որևէ էքստրաօրդինար գնահատական տալ և կարծում է, որ միգուցե անվտանգության նկատառումներով են պայմանավորված այդ ստուգումները:

«Որոշակի ենթատեքստ, ուղղվածություն կամ միտում բացառապես ընդդիմադիր խմբակցության ներկայացուցիչների նկատմամբ ես չէի ցանկանա տեսնել:Բոլոր այն մարդիկ, ովքեր որևէ թաքցնելու բան չունեն, կարծում եմ որևէ դիսկոմֆորտի մեջ չպետք է ընկնեն»›,-ասաց Տոնոյանը:

Նրա խոսքով, ցանկանլի է, որ այդ ամենը շատ ավելի աննկատ լինի և ոչ այնքան դեմոնստրատիվ, որքան հիմա է:

«Եթե տնտեսական մուտքով ենք մտնում, ապա այդ դեպքում պայուսակը նույնպես նայում են, որովհետև այդտեղ, եթե չեմ սխալվում, սարքի հետ կապված ինչ-որ խնդիր կա»,-նշեց ԲՀԿ պատգամավորը:

Լրագրողի հարցին, թե նախկինում այսպիսի ստուգումներ եղել են, ԲՀԿ պատգամավորը պատասխանեց, որ կարծես թե նման խստացված ստուգում չի եղել, ինքը այդպիսի դեպք չի հիշում:

Աղբյուր` Փաստինֆո