Փաստ ինֆո

Հայաստան և Արցախ հակադրումը շատ վտանգավոր միտում է, լինի դա հեղափոխության, հակահեղափոխության կամ որևէ այլ կոնտեքստում, Արցախի և Հայաստանի հակադրումը հղի է շատ լուրջ հետևանքներով: Սա պետք է գիտակցի և՛ Հայաստանի, և՛ Արցախի ղեկավարությունը: Այսօր լրագրողների հետ զրույցում ասաց ‹‹Լուսավոր Հայաստան›› խմբակցության պատգամավոր Գևորգ Գորգիսյանը:

‹‹Վերջին շրջանում, ցավոք, փոխադարձ տարբեր մակարդակներում անհարգալից վերաբերմունքների մի քանի դեպքերի ականատես եղանք, ինչը սխալ և վատ է››,-ասաց պատգամավորը:
Նրա խոսքով, անկախ նրանից՝ ինչ անձնական հարաբերություններ ունեն կամ անձնական մակարդակով ինչպես են վերաբերվում միմյանց, երկու կողմերն էլ պետք է պահպանեն քաղաքական ճիշտ խաղի կանոնները, միմյանց նկատմամբ բարձր մակարդակի հարգանքը, որովհետև կա մեկ նպատակ, և այդ նպատակին հասնելուն քաղաքականության մեջ անձնական հարցերը չեն կարող դեր խաղալ:

‹‹Արցախն ու Հայաստանը չպետք է որևէ կերպ հակադրվեն միմյանց, անկախ նրանից՝ որտեղ ով կլինի իշխանության››,-ասաց Գորգիսյանը:

Նա նշեց, որ նույնիսկ եթե ամենավատ սցենարով Ռոբերտ Քոչարյանը Արցախում գա իշխանության, միևնույն է Հայաստանն ու Արցախը պետք է որպես մեկ բռունցք աշխատեն ծառայելու Հայաստանի և Արցախի քաղաքացիների շահերին:

Հեղինակ` Սոնա Գեւորգյան