Փաստ ինֆո

Մենք քաղաքական առումով պիտի կողմնորոշվենք՝ հակակոռուպցիոն ինչ մոդել ենք որդեգրում, որ միանգամից նույն հարցը 2 անգամ չլուծենք․ մի հատ միջանկյալ մարմին ձևավորենք, հետո ասենք, լավ չէ, այս մարմինը ամբողջական չի, եկեք ձևավորենք նոր մարմին։

Այսօր հրավիրված ասուլիսում ասաց ՀՀ վարչապետ Նիկոլ Փաշինյանը, անդրադառնալով «Փաստինֆո»-ի թղթակցի այն հարցին, թե արդյոք կառավարությունը պատրաստվում է մեխանիզմներ մշակել, որպեսզի բարձրաստիճան պաշտոնատար անձանց էթիկայի հանձնաժողովը պաշտոնյաների եկամուտների աղբյուները ստուգելու լծակներ ունենա։

Նա նշեց, որ նախորդ խորհրդարանը պետք է ինչ-որ օրենսդրական մեխանիզմներ մշակեր, բայց քաղաքական իրադարձությունների պատճառով նրանք դա չեն արել, և օրենքի գործունեության ժամկետներն էլ սպառվել են։
Վարչապետի խոսքով, հիմա հարցը դրված է խորհրդարանական տիրույթում և խորհրդարանը պետք է լուծի այդ խնդիրը։

«Փաստինֆո»-ի մեկ այլ հարցին, թե արդյոք վարչապետը պատրաստվում է արձագանքել «Լուսավոր Հայաստան» խմբակցության հերքման պահանջին և համամիտ է, որ զրպարտական բնույթի տեղեկատվություն է տարածել մայիսի 2-ին կառավարության բաց նիստում, Փաշինյանն ասաց․
«Օրենքի նախագիծ է ներկայացվել, ասվում է հրապարակեք՝ ինչ զենք, զինամթերք եք անվտանգության համար օգտագործում և այլն, ես էլ ընդամենը բրոտեսկ եմ արել, ասել եմ մնում է ասենք ով է ամենալավը կրակում, ով է ամենավատը կրակում և ինչպես է ավելի հարմար ահաբեկչական ակտ իրականցնել կառավարության դեմ, ինչը՞ հերքեմ»,-ասաց Փաշինյանը։

«Փաստինֆո»-ն փորձեց ճշտել նաև՝ այնուամենայնիվ վարչապետը ստացել է հերքման պահանջը, Փաշինյանն  ասաց՝ իրեն ասել են նման ինչ-որ պահանջ կա։

Հիշեցնենք, որ «Լուսավոր Հայաստան» կուսակցությունը օրենքի նախագիծ էր մշակել «Խոսքի ազատության պաշտպանության» կազմակերպության հետ միասին, որով առաջարկվում էր փոփոխություն կատարել «Գնումների մասին» ՀՀ օրենքում եւ կրկին հանրայնացնել Նախագահի, վարչապետի, ԱԺ նախագահի ծախսերը։

Կառավարության նիստում քննարկման ժամանակ հավանություն չտրվեց նախագծին։ «Այսինքն առաջարկվում է պաշտոնատար անձանց գրաֆիկները նախապես ինտերնետում դնել, գրել, թե քանի անվտանգության աշխատակից է ուղեկցում, ինչ զենքերով են զինված, ով ավելի լավ ու վատ կրակում` կից խորհրդատվությամբ, թե ոնց է ավելի լավ ահաբեկչական ակտ իրականացնել տվյալ պաշտոնատար անձի նկատմամբ»,- հայտարարել էր վարչապետ Փաշինյանը:

Այս հայտարարությանն արձագանքել էր «Լուսավոր Հայաստան» կուսակցության նախագահ Էդմոն Մարուքյանը։ «Պատկերացնում եք, ինչ է սա նշանակում, այսօր ՀՀ քաղաքացիները մտածում են, որ մենք տեռորիստներին աջակցող խմբավորում ենք: Մինչդեռ խոսքը գնում է` այցելություններից հետո հյուրանոցների, ինքնաթիռների վրա կատարված ծախսերի մասին, ինչը ժամանակին եղել է հրապարակային»,- ֆեյսբուքյան ուղիղ եթերում ասել էր նա:

Իսկ մայիսի 3-ին «Լուսավոր Հայաստան» խմբակցությունը պաշտոնական հայտարարություն տարածեց՝ վարչապետից հերքում պահանջելու մասին։

Հեղինակ` Սոնա Գեւորգյան