Փաստ ինֆո

«Ամեն դեպքում, ես կարծում եմ, որ սխալ կլինի, եթե գործը շարունակի քննել դատավոր Դավիթ Գրիգորյանը», -«Փաստինֆո»-ի հետ զրույցում այս կարծքը հայտնեց Ռոբերտ Քոչարյանի պաշտպաններից Հայկ Ալումյանը։

Բանն այն է, որ դատավոր Դավիթ Գրիգորյանի նկատմամբ այս պահին հարուցված կարգապահական վարույթ կա, ինչը, ըստ Ալումյանի, նրան դարձնում է առավել խոցելի. «Այսինքն՝ նրա գլխին կախված է մեծ խնդիր, որը գուցե այն լծակն է, ինչի միջոցով այդ դատավորը կարող է դառնալ առավել զգայուն ցանկացած ճնշումների նկատմամբ»։

Հայկ Ալումյանն ասում է, որ չգիտի, թե ինչ տեխնոլոգիաներով է գործը նորից մակագրվել նույն դատավորին. «Նախ պետք է հասկանալ՝ արդյո՞ք դա եղել է կամայական որոշում թե՞ համակարգչային ծրագրով է կատարվել, բայց ամեն դեպքում, ես կարծում եմ, որ այդ դատավորը պատկերացնում է, որ երկրորդ անգամ ինքնաբացարկ հայտնելու դեպքում արդեն երկու վարույթ կլինի, եւ խնդիրները կբազմապատկվեն»։

Հիշեցնենք՝ մայիսի 5-ին Բարձրագույն դատական խորհուրդը հաստատել էր, որ «Մարտի 1»-ի գործը երկրորդ անգամ մակագրվել է Երևանի ընդհանուր իրավասության դատարանի դատավոր Դավիթ Գրիգորյանին։ Նա նախկինում ինքաբացարկ էր հայտնել Քոչարյանի խափանման միջոցի քննության գործով՝ նշելով, որ ինքը հերթապահ չի եղել, սակայն գործն իրեն է մակագրվել։

Ավելի ուշ «Փաստինֆո»-ի հետ զրույցում Բարձրագույն դատական խորհրդի նախագահ Գագիկ Հարությունյանն ասել էր, որ դատավոր Դավիթ Գրիգորյանը դիմել է ԲԴԽ՝ առողջական խնդիրների պատճառով իրեն կարգապահական պատասխանատվության ենթարկելու հարցի քննարկումը հետաձգելու համար, ինչը հետաձգվեց մինչ մայիսի 2-ը։

Որոշումը կլինի մայիսի 13-ին։

Հեղինակ` Միլենա Խաչիկյան