Փաստ ինֆո

2018 թվականի դեկտեմբերի 4-ին սահմաններում, ՀՀ Շիրակի մարզի մարզի Մարալիկի տարածաշրջանի Քարաբերդ բնակավայրի հարևանությամբ ԶՈՒ ՍՈՒ 25 ինքնաթիռի կործանման դեպքի առթիվ հարուցված քրեական գործով նշանակված փորձաքննություններից մեկի պատասխանը հայտնի է։ Տեղեկությունը «Փաստինֆո»-ի հետ զրույցում հաստատեց ՀՀ քննչական կոմիտեի տեղեկատվության եւ հասարակայնության հետ կապերի բաժնի պետի պաշտոնակատար Նաիրա Հարությունյանը. «Վառելիքի նմուշի դատանյութագիտական փորձաքննությամբ պարզվել է, որ սառեցման ջերմաստիճանի, մեխանիկական խառնուկների ջրի, մասազտիչ կազմի, բռնկման ջերմաստիճանի, ընդհանուր ծծմբի զանգվածային բաժնի և խտության ցուցանիշներով այն համապատասխանում է ռեակտիվ շարժիչի վառելիքին ներկայացվող պահանջներին»,-փոխանցեց Հարությունյանը։

Նշենք, որ ինքնաթիռի թռիչքից առաջ` նախաթռիչքային սպասարկման ժամանակ, վառելիքի մաքրությունը ստուգելու նպատակով վերցվել էր փորձանմուշ, որը նույն օրը առգրավվել էր: Առգրավված վառելիքի նմուշով նշանակվել էր դատանյութագիտական փորձաքննություն:

Հիշեցնենք, որ 2018 թվականի դեկտեմբերի 4-ին՝ ժամը 10։20-ի սահմաններում, խզվել էր կապը ամենօրյա մարտական պատրաստության պլանով ուսումնամարզական թռիչք իրականացնող ՀՀ զինված ուժերի ՍՈՒ-25 մարտական ինքնաթիռի հետ, որը երթուղի էր դուրս եկել ժամը 10։06-ին` Գյումրիի օդանավակայանից: Ավելի ուշ պարզ էր դարձել, որ ինքնաթիռը կործանվել է։

Դեպքի առթիվ հարուցվել էր քրեական գործ ՀՀ քրեական օրենսգրքի 378-րդ հոդվածի 2-րդ մասի հատկանիշներով։

Հեղինակ` Միլենա Խաչիկյան