Փաստ ինֆո

Ֆուտբոլային դիվանագիտությունը պետք էր ժամանկին սկսել, բայց սպասելով , որ Թուրքիան դրան պատրաստ լինի: Այսօր Ծիծեռնակաբերդի հուշահամալիր կատարած այցի ժամանակ ասաց ‹‹Լուսավոր Հայաստան›› խմբակցության ղեկավար Էդմոն Մարուքյանը:

‹‹Հայաստանը անպատրաստ իրավիճակում սկսեց այդ պրոցեսը , թուրքական պետությունը մտավ պրոցեսի մեջ, իր բոլոր հնարավորություններով շահեց, այն վիժեցրեց, Հայաստանն էլ ոչինչ չշահեց այդտեղ››,-ասաց Մարուքյանը:
Նա կարծում է, որ ցանկացած նմանատիպ նախաձեռնություն սկսելուց առաջ պետք է լավ նախապատրաստական աշխատանք տանել, որպեսզի ոչ թե Թուրքիան դրանից շահի, այլ ընդհանրապես մարդկությունը, ցեղասպանությունը ճանաչվի, դատապարտվի և դիվանագիտական հարաբերություններ վերսկսվեն Հայստանի և Թուրքիայի միջև, սահմաններն էլ բացվեն:

‹‹Ըստ էության սահմանների բացումը այլընտրանք չունի, վաղ թե ուշ պետք է հասնել դրան, բայց միևնույն ժամանակ պետք է բոլոր եղած հարցերը քննարկվեն, որոշումներ ընդունվեն դրանց վերաբերյալ, հետո նաև գնանք սահմանների բացմանը››,-ասաց ԼՀԿ առաջնորդը:
Նա նշեց, որ փորձը ցույց է տվել՝ առանց նախապայմանների հարաբերությունների վերսկսման պատրաստակամությունը չաշխատեց և հիմա միգուցե էլի կարելի է ասել՝ առանց նախապայմանների պատրաստ ենք ցանկացած խոսակցություն վերսկսելու, բայց դա չի կարող ծառայել միայն թուրքական կողմին, այսինքն եթե հայկական կողմը այդտեղ հստակ շահեր չի հետապնդում, դա դառնում է ուղղակի անիմաստ խոսակցություն:

‹‹Ես կարծում եմ, որ պետք է սահմանները առանց նախապայմանների բացվեն, որովհետև 21-րդ դարում Եվրոպայի վերջին սահմանն է, որ փակ է և միայն բացելուց հետո պետք է շարունակենք խոսել տարբեր հարցերի վերաբերյալ››,-ասաց Մարուքյանը:
Նրա խոսքով, ի սկզբանե պարզ է եղել, որ Թուրքիան Հայաստանի հետ հարաբերությունների հարցը կապելու է Ղարաբաղյան հակամարտության հետ և ինքը զարմանում է, թե ինչու ժամանակին դա չէր կանխատեսվել :

Մարուքյանը նշեց նաև, որ Թուրքիան և Ադրբեջանը միասնական ունեն մեկ ազգ, երկու պետություն և Թուրքիայի բլոկադան, որը բոլոր նորմերի խախտում է, կոնկրետ ծառայում է Ադրբեջանի շահերին և նույնիսկ Թուրքիայի ազգային շահերից էլ չի բխում:

Հեղինակ` Սոնա Գեւորգյան