Փաստ ինֆո

Մարտի 12-ին Ազգային անվտանգության ծառայության կողմից բերման ենթարկված Կոստանտին Հովհաննիսյանին մեղադրանքներ են առաջադրվել ՀՀ քրեական օրենսգրքի մի քանի հոդվածներով։  «Փաստինֆո»-ի գրավոր հարցմանն ի պատասխան՝ ՀՀ ԱԱԾ քննչական դեպարտամենտի պետ Ա. Աղաջանյանը տեղեկացրել է, որ նրան մեղադրանքներ են առաջադրվել  ՀՀ ՔՕ-ի 178-րդ հոդվածի 3-րդ մասի 1-ին կետով, այն է՝ առանձնապես խոշոր չափերով խարդախությունը, 325-րդ հոդվածի 2-րդ մասով, այն է՝ մի խումբ անձանց կողմից նախնական համաձայնությամբ փաստաթուղթ կեղծելը, եւ 235-րդ հոդվածի 1-ին մասով, այն է՝ ապօրինի կերպով հրազեն, ռազմամթերք ձեռք բերելն ու պահելը։ Նշված հոդվածները նախատեսում են երկարատեւ ազատազրկում։

ԱԱԾ պատասխանում նշվում է նաեւ, որ Կ. Հովհաննիսյանի նկատմամբ որպես խափանման միջոց կալանավորումն ընտրելու միջնորդություն ներկայացվել էր՝ հաշվի առնելով նրան մեղսագրվող արարքների բնույթը, հանրային վտանգավորության աստիճանը, ինչպես նաեւ՝ ազատության մեջ լինելու պայմաններում վերջինիս կողմից քրեական օրենքով չթույլատրված նոր արարք կատարելու, քննությանը խոչընդոտելու եւ պատժի խստությամբ պայմանավորված՝ վերջինիս կողմից պատժից խուսափելու հավանականությունը։ Միջնորդությունը բավարարվել է հաջորդ օրը՝ մարտի 15-ին, եւ Հովհաննիսյանը կալանավորվել է։

Հիշեցնենք, որ «Փաստինֆո»-ի հետ զրույցում Կ. Հովհաննիսյանի փաստաբան Սուսաննա Սարգսյանը նշել էր, որ իր պաշտպանյալի առողջական վիճակը ծայրահեղ ծանր է, անհամատեղելի կալանքի հետ, ենթարկվել է երիկամի փոխպատվաստման։

«Փաստինֆո»-ն գրավոր հարցմամբ դիմել էր նաեւ Արդարադատության նախարարություն՝ պարզելու, թե ի վերջո ինչ հիվանդություն ունի կալանավորը, եւ որտեղ է նա պահվում։

ՀՀ արդարադատության նախարարության քրեակատարողական ծառայության պատասխանում ասվում է, որ Կ.Հովհաննիսյանն իրապես ենթարկվել է երիկամի փոխպատվաստման, բայց շուրջ 10 ամիս առաջ՝ 2018 թվականի հունիսին։ Ըստ «Արաբկիր» բժշկական կենտրոնի եզրակացության՝ ախտորոշվել է «Շաքարային դիաբետ 2-րդ տիպ։ Դիաբետիկ նեֆրոպաթիա։ ՔԵԱ, տերմինալ շրջան։ «Արմենիա» ԲԿ-ում կատարված հետազոտություններից և խորհրդատվություններից հետո էլ ախտորոշվել է ոչ միայն «Շաքարային դիաբետ 2-րդ տիպ», այլ նաև դիաբետիկ մակրո և միկրոանգիոպաթիա։ Դիաբեթիկ ոտնաթաթի համախտանիշ։ Ձախ ստորին վերջույթի 4-րդ, 5-րդ մատների գանգրենա. «Ներկայումս իրականացվում են նախապատրաստական աշխատանքներ Կոնստանտին Հովհաննիսյանի ձախ ոտնաթաթի ռեզեկցիա և 2-րդ, 4-րդ և 5-րդ մատների ամպուտացիա կատարելու ուղղությամբ»,-նշված էր Քրեակատարողական ծառայության պատասխանում։ 

ՀՀ արդարադատության նախարարության հավաստմամբ՝ լինելով կալանավորված անձ նամ համապատասխան բուժօգնություն է ստանում քաղաքացիական հիվանդանոցում։ Մասնավորապես՝ ինչպես հայտնել է ԱՆ-ն, 2019 թվականի մարտի 15-ին Կոնստանտին Հովհաննիսյանը ՀՀ ոստիկանության Երևան քաղաքի վարչության ձերբակալվածներին պահելու վայրից տեղափոխվել է «Արմավիր» քրեակատարողական հիմնարկ, որտեղից էլ անմիջապես ուղղորդել են  «Դատապարտյալների հիվանդանոց» քրեակատարողական հիմնարկ։ «Դատապարտյալների հիվանդանոց» ՔԿՀ-ի ընդունարանում համապատասխան մասնագետներն իրականացրել են զննություն և առողջական վիճակը գնահատելով ծանր՝ տեղափոխել են «Արմենիա» ԲԿ։ Մարտի 26-ին հարազատների խնդրանքով Կ. Հովհաննիսյանը նշված բժշկական կենտրոնից տեղափոխվել է «Աստղիկ» ԲԿ, որտեղ էլ առ այսօր նեֆրոլոգի, էնդոկրինոլոգի և կարդիոլոգի հսկողության տակ ստանում է ստացիոնար բուժում։

«Փաստինֆո»-ի հետ զրույցում Կ.Հովհաննիսյանի փաստաբան Սուսաննա Սարգսյանը նշել էր, որ դիմում են գրել ԱՆ, սակայն նախարարությունից ստացված գրավոր պատասխանի համաձայն, փաստաբանից գրավոր բողոք չեն ստացել։

Աղբյուր` Փաստինֆո