Փաստ ինֆո

‹‹Կարող եք գնալ իմ կառույցներում հարցնել ինչ Դավիթ Անանյանը եկել է պաշտոնի, ոչ թե 1 օր, 10 օր, 15 օր, ամբողջ ուղղությունը Ծառուկյանն է: Ես էլ ասում եմ՝ օրենքի առաջ բոլորը հավասար են, ստուգում եք, գնացեք ստուգեք ինչ կուզեք, այնտեղից դուրս չեն գալիս, թե ինչ են փնտրում՝ չգիտեմ››,- լրագրողների հետ զրույցում ասաց ‹‹Բարգավաճ Հայաստան›› խմբակցության ղեկավար Գագիկ Ծառուկյանը՝ անդրադառնալով պետական եկամուտների կողմից իր հաստատություններում շարունակաբար ավելացող ստուգումներին։

Նա նշեց, որ ստուգումների ավարտից հետո ինքը հավաքելու է բոլոր լրագրողներին և «կետ առ կետ, ‹‹դոկումնետալ›› հարց ու պատասխանի միջոցով բոլորի համար պարզ են դառնալու ՊԵԿ-ի գործերը, մոտեցումը, աշխատանքը և թե ում են ստուգում, ում չեն ստուգում»։

Անդրադառնալով ‹‹Առինջ մոլ››-ում մի քանի տասնյակ ՊԵԿ աշխատակիցների իրականացրած խուզարկությանը՝ Ծառուկյանն ասաց.

‹‹ Հարկային մարմիններին հարցրեք, Ծառուկյանին ոչ մի բան չեն կարա անեն, ինչ անում են՝ անում են ի վնաս երկրի, տնտեսության, փոքր ու միջին բիզնեսի են անում: Ուզում է 5000 հոգով գան ստուգման, քամին քարից ի՞նչ պետք է տանի››:

ԲՀԿ ղեկավարի խոսքով, 2200 խանութ վախից ոչ ոք չի մտել: Ամբողջ օրը վաճառվել է 1 խաղալիք:

Հիշեցնենք, որ օրերս ստուգումներ էին իրականացվել «Առինջ մոլ» տոնավաճառում և «Մուլտի գրուպ» կոնցեռնում: Թե՛ «Առինջ մոլ»-ը և թե՛ «Մուլտի գրուպ» կոնցեռնը պատկանում են ԲՀԿ խմբակցության ղեկավար Գագիկ Ծառուկյանի ընտանիքին։

ԲՀԿ պատգամավոր Իվետա Տոնոյանը «Փաստինֆո»-ի  թղթակցի հետ զրույցում այս հանգամանքը կապել էր Ծառուկյանի կողմից իշխանության հասցեին հնչեցրած քննադատությունների հետ։

«Գագիկ Ծառուկյանի, «Բարգավաճ Հայաստանի» հնչեցրած քննադատություններից հետո նախ պետական եկամուտների կոմիտեն է ստուգումներ սկսում «Առինջ մոլ»-ում, ապա շուկայի վերահսկողության տեսչական մարմնի աշխատակիցներն են այցելում Ծառուկյանին պատկանող գազալցակայան»,-ասել էր պատգամավորը։

Աղբյուր` Փաստինֆո