Փաստ ինֆո

Վերաքննիչ քրեական դատարանում` դատավոր Սերգեյ Մարաբյանի նախագահությամբ, քիչ առաջ որոշում կայացվեց մերժել դատավոր Գագիկ Հեբոյանի պաշտպանական կողմի բողոքը` վերջինիս նկատմամբ ընտրված խափանման միջոց կալանավորման դեմ: Այս մասին «Փաստինֆո»-ն տեղեկացավ Հեբոյանի պաշտպան Կրոմվել Գրիգորյանից. «Այն կարեւոր ապացույցները, որ անհրաժեշտ են կաշառք ստանալը ապացուցելու համար, վարույթ իրականացնող մարմինը չունի»,-նիստից հետո մեզ հետ զրույցում ասաց Գրիգորյանը:

Նրա խոսքով` այսօրվա նիստի ընթացքում քննիչը ներկայացրեց գործով հանցակից փաստաբան Վահագն Դանիելյանին մեղադրանք առաջադրելու մասին որոշումը, որի վերաբերյալ պաշտպանական կողմը առարկություններ ներկայացրեց. «Մենք համաձայն չենք այդ որոշման մեջ  արձանագրված հետեւություններին, որովհետեւ դրանք հիմնված են բացառապես ենթադրությունների վրա»:

Նշենք, որ Գագիկ Հեբոյանը այսօրվա նիստին ներկա էր: Պաշտպանի խոսքով` նա չի ընդունում, որ փաստաբան Վահագն Դանիելյանը օժանդակել է իրեն. «Հեբոյանը դատարանի դահլիճում բացատրություն Է տվել է, շեշտել, որ վերցրած գումարը եղել է իր պարտքի մի մասը. եթե ինքը նախապես իմանար, որ դա մշակված գումար է, չէր վերցնի»:

Մեր այն հարցին, թե մեղադրող կողմը ինչպես է հիմնավորում, որ դա կաշառքի գումար է, պաշտպանը նշեց, որ դրա համար հիմք է ընդունում քաղաքացի Բենիկ Հարությունյանի կողմից ներկայացրած հաղորդումը, բացատրություններն ու ցուցմունքները. «Դատարանը նաեւ կարծում է, թե մնալով ազատության մեջ` Գագիկ Հեբոյանը կարող է խուսափել գործի քննությունից, ընդհուպ մինչեւ` մեկնել արտերկիր»:

«Փաստինֆո»-ն հետաքրքրվեց` տվյալ դեպքում, երբ Գագիկ Հեբոյանը չի ընդունում իրեն առաջադրված մեղադրանքը, ենթադրո՞ւմ է արդյոք, թե դրա հիմքում ինչ կարող է լինել. «Չեմ կարող ասել, բայց նշեմ, որ տվյալ քաղաքացու բողոքի հիման վրա 2013 թվականին Հեբոյանը ենթարկվել է կարգապահական պատասխանատվության. այն դեպքում, երբ տվյալ քաղաքացին դատավորին ընդունում է որպես թշնամի, դատավորը ո՞նց կարող է պայմանավորվել նրա հետ եւ կաշաքի գումար վերցնել»,-ասաց պաշտպանը` հավելելով, որ վճիռը, որի համար իր պաշտպանյալը ժամանակին ենթարկվել է պատասխանատվության, նույն քաղաքացու կողմից բողոքարկվել է Վերաքննիչ դատարանում եւ մնացել օրինակ ուժի մեջ:

Պաշտպանի խոսքով` որոշումը ստանալուց հետո կհասկանան` բողոքարկելու են այն թե ոչ:

Նշենք, որ սա գործով երկրորդ նիստն էր: Նախորդը տեղի էր ունեցել ապրիլի 10-ին:

Հիշեցնենք, որ Կոտայքի մարզի ընդհանուր իրավասության դատարանի դատավոր Գագիկ Հեբոյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ և 3-րդ կետերով՝ փաստաբանի օժանդակությամբ ստացել է առանձնապես խոշոր չափերով կաշառք ստանալու համար:

Ըստ առաջադրված մեղադրանքի` դատավորն իր վարույթում քննվող քաղաքացիական գործով հայցվորի օգտին գործողություն կատարելու, այն է` վերջինիս 3.400.000 ՀՀ դրամ պետական տուրքը վճարելուց ազատելու դիմաց 2019թ. մարտի 4-ին նրանից պահանջել է առանձնապես խոշոր չափերի` 1.715.000 ՀՀ դրամին համարժեք` 3500 ԱՄՆ դոլար կաշառք: Քաղաքացու հետ սակարկելու արդյունքում Գ. Հեբոյանը նրա հետ վերջնական պայմանավորվածություն է ձեռք բերել հիշյալ գործողությունը կատարելու դիմաց 1.225.000 ՀՀ դրամին համարժեք 2500 ԱՄՆ դոլար կաշառք ստանալու վերաբերյալ: Խուսափելով կաշառքի առարկան անձամբ վերցնելուց և բացահայտվելուց` դատավորը դիմել է իր ծանոթ փաստաբանի օժանդակությանը. 2019թ. մարտի 27-ին հիշյալ քաղաքացին ԱԱԾ-ի կողմից իրականացված օպերատիվ-հետախուզական միջոցառման շրջանակներում 2500 ԱՄՆ դոլար կաշառքի գումարը տվել է փաստաբանին, ով նույն օրը այն փոխանցել է դատավորին:

Հեղինակ` Միլենա Խաչիկյան