Փաստ ինֆո

Վերաքննիչ քրեական դատարանում՝ դատավոր Ռուզաննա Բարսեղյանի նախագահությամբ, մեկնարկել է ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորումը ևս երկու ամսով երկարացնելու վերաբերյալ առաջին ատյանի դատարանի որոշման դեմ պաշտպանական խմբի կողմից ներկայացված բողոքի քննության շարունակությունը:

Նիստից առաջ Քոչարյանի պաշտպան Հայկ Ալումյանը, անդրադառնալով Սասուն Խաչատրյանի այն խոսքերին, թե մնալով ազատության մեջ՝ Ռոբերտ Քոչարյանը կարող է խոչընդոտել գործին, ասաց, որ քննիչն ու դատախազն էլ դրան զուգահեռ նշում են, թե նա կարող է նաեւ թաքնվել գործի քննությունից. «Այսինքն՝ իրենք իրար մեջ դեռ չեն կողմնորոշվել»: Պաշտպանը պնդեց, որ իրականությունն այլ է, եւ նման ենթադրությունների համար հիմքեր չկան:

Նշենք, որ նախորդ նիստին պաշտպանական կողմը ավարտել էր բողոքի ներկայացումը: Այսօր նախատեսվում է անցկացնել առարկությունների եւ մեկնաբանությունների փուլը, որից հետո արդեն դատարանը կգնա` որոշում կայացնելու:

Քոչարյանը այսօրվա նիստին ներկա է, հնարավոր է՝ նա եւս դատարանում ելույթ ունենա:

Հիշեցնենք, որ մարտի 15-ին դատարանը բավարարել էր ՀՀ երկրորդ նախագահ Ռոբերտ Քոչարյանի կալանավորման ժամկետը եւս 2 ամսով երկարացնելու մասին ՀՔԾ քննիչի միջնորդությունը: Միաժամանակ մերժվել էր պաշտպանական կողմի միջնորդությունը` Քոչարյանի նկատմամբ գրավ կիրառելու մասին:

Պաշտպանական կողմը բողոք էր ներկայացրել ընտրված խափանման միջոց կալանավորումը ևս երկու ամսով երկարացնելու վերաբերյալ առաջին ատյանի դատարանի որոշման դեմ, որի քննությունը սկսվել էր ապրիլի 4-ին: Նշենք, որ դատարանը միաժամանակ քննում էր նաև Դատախազության բողոքը` ընդդեմ դատարանի որոշման պատճառաբանական այն մասի, ըստ որի` կաշառքի դրվագով հիմնավոր կասկածը բացակայում է, և չկան հիմքեր ենթադրելու, թե ազատության մեջ մնալով` Քոչարյանը կխուսափի քննությունից:

Հեղինակ` Միլենա Խաչիկյան