Փաստ ինֆո

Նախօրեին պաշտոնապես հաստատվեց, որ  առողջապահության նախարարի տեղակալը կասկածվում է առանձնապես խոշոր չափերով կաշառք ստանալու մեջ:

Ամեն ինչ տեղի ունեցավ այնպես, ինչպես կինոներում է լինում՝ լայնածավալ օպերատիվ-հետախուզական միջոցառումներ,  համալիր քննչական գործողություններ, որոնք վկայեցին, որ՝ ձեռք են բերվել փաստական տվյալներ, որ բժշկական հաստատության տնօրենը նպատակ է ունեցել ապահովել առողջապահության նախարարության կողմից բուժհաստատություններին տրամադրվող ֆինանսավորման աշխատանքները համակարգող փոխնախարարի հովանավորչությունը և նրա հետ ձևավորել իր համար բարենպաստ աշխատանքային պայմաններ:

Ասել է, թե՝ տվյալ բուժհիմնարկի նկատմամբ ոլորտային գերատեսչությունն ի սկզբանե ստեղծել է անբարենպաստ պայմաններ, այսինքն, ենթադրվում է, որ առողջապահության նախարարության համար գոյություն ունեն յուրայիններ և ոչ յուրայիննե՞ր:

Դարձյալ վկայակոչենք պաշտոնական տեղեկատվությունը, ըստ որի՝

վերաբաշխման արդյունքում պետպատվերի շրջանակներում տարբեր ծրագրերով հատկացվելիք գումարներով կազմակերպության ֆինանսավորման պակասը լրացնելու համար բուժհիմնարկի տնօրենը  2019 թվականի մարտի 30-ին առողջապահության նախարարի տեղակալին վերջինիս աշխատասենյակում որպես կաշառք տվել է առանձնապես խոշոր չափերով գումար:  Եվ  այս փոխանցումն իրականացվել է  ՀՀ ԱԱԾ աշխատակիցների օպերատիվ վերահսկողության ներքո:

«Փաստինֆո»-ի տեղեկություններով՝ առողջապահության  փոխնախարարը բանակցությունները բուժհաստատության տնօրենի հետ վարել է նախարարի անունից, ընդ որում՝ նախարարության շենքում։ Ավելին՝  երեկ առողջապահության նախարար Արսեն Թորոսյանը Ազատություն ռ/կ եթերով, իր ՖԲ ասուլիսի ժամանակ հնչած հարցին ի պատասխան ընդունեց, որ  փոխնախարարը չի կարող առանց նախարարի հրամանի փոխել պետպատվերի շրջանակում բուժհաստատություններին տրամադրվող գումարը։ Թերեւս դա էր պատճառը, որ նա շտապեց հայտարարել իր աջակցությունը իրավապահ մարմիններին։ «Նման երևույթներն անթույլատրելի են և դատապարտելի։ Մեր աջակցությունն ենք հայտնում իրավապահ մարմիններին` կոռուպցիայի դեմ պայքարում։ Անկեղծորեն հավատում ենք, որ համակարգում տեղ գտած կոռուպցիայի և հակաօրինական այլ երևույթների բացահայտումը կօգնի արմատախիլ անել դրանք և առողջացնել համակարգը»-, հայտարարեց Արսեն Թորոսյանը՝ կարծես շտապելով իր վրայից գցել տարբեր կողմերից իրեն հասկանալիորեն ուղղվելիք մեղադրանքները:

Ի դեպ, որքան էլ Արսեն Թորոսյանը ցանկանա իրեն զատել իր անմիջական տեղակալից,փաստ է, որ նա նոր իշխանությունների կադրն է, ով այդ պաշտոնին նշանակվել է 2018 թվականի մայիսին՝ իշխանափոխությունից հետո։  Գործարքը կատարվել է նրա իսկ ղեկավարած գերատեսչության հարկի ներքո  եւ տրամաբանական մի քանի կարևոր հարցադրումներ է առաջանում: Դրանցից առաջինն այն է, որ կամ կաշառատվության գործարքը տեղի է ունեցել նախարար Արսեն Թորոսյանի գիտությամբ կամ ոլորտը ղեկավարող Արսեն Թորոսյանը պարզապես չի տիրապետում իրավիճակին: 

Իսկ քանի որ նման փաստերն  արդեն ընդհանրական բնույթ են ստանում՝ վկա՝ Դավիթ Սանասարյանի ղեկավարած վերահսկողական ծառայության աշխատակիցների դրվագը, ուստի կարող ենք հստակ արձանագրել, որ ոչ թե այս կամ այն լոկալ գերատեսչությունը, այլ՝  Ն. Փաշինյանի ողջ կադրային քաղաքականությունը կարիք ունի լուրջ   փոփոխության:

Հեղինակ` Քրիստինե Հարությունյան