Փաստ ինֆո

ՀՀ պատկան մարմինները չեն շտապում հաստատել մամուլում շրջանառվող այն լուրերը, ըստ որոնց՝ երեկ երեկոյան կաշառքի կասկածանքով դատավոր է ձերբակալվել։ «Փաստինֆո»-ն կապ հաստատեց Դատախազության հասարակայնության հետ կապերի եւ լրատվության բաժնի պետ Արեւիկ Խաչատրյանի հետ, ով ասաց. «Օրվա ընթացքում կտրվի տեղեկություն»։

Լուրերը ճշտելու համար դիմեցինք նաեւ Ազգային անվտանգության ծառայության մամուլի կենտրոնի ղեկավար Սամսոն Գալստյանին։ Վերջինիս փոխանցմամբ՝ այս պահի դրությամբ լրատվամիջոցներին հաղորդելու տեղեկություն չունեն։

Հիշեցնենք, որ երեկ ArmLur.am-ը հայտնել էր, որ խոշոր չափի կաշառք վերցնելու մեղադրանքով ձերբակալվել էր մարզերից մեկում աշխատող դատավոր։ Ավելի ուշ մամուլում գրվեց, որ խոսքը Կոտայքի մարզի ընդհանուր իրավասության դատարանի դատավոր Գագիկ Հեբոյանի մասին է։

Նշենք, որ ՀՀ դատական օրենսգրքի 51-րդ հոդվածի համաձայն 3-րդ մասի համաձայն` դատավորն իր լիազորությունների իրականացման կապակցությամբ առանց Բարձրագույն դատական խորհրդի համաձայնության չի կարող զրկվել ազատությունից, բացառությամբ երբ նա բռնվել է հանցանք կատարելու պահին կամ անմիջապես դրանից հետո: Իսկ 5-րդ մասն ամրագրում է, որ 3-րդ մասով նախատեսված դեպքերում դատավորին ազատությունից զրկելը չի կարող տևել յոթանասուներկու ժամից ավելի: Դատավորին ազատությունից զրկելու մասին անհապաղ տեղեկացվում են Բարձրագույն դատական խորհրդի նախագահը և գլխավոր դատախազը: Դատավորին ձերբակալելու մասին որոշումն անհապաղ ուղարկվում է Բարձրագույն դատական խորհուրդ և գլխավոր դատախազին:

Հեղինակ` Միլենա Խաչիկյան