Փաստ ինֆո

«Իմ քայլը» խմբակցության պատգամավոր Նիկոլայ Բաղդասարյանի գնահատմամբ՝ իրավական տեսակետից ոչ մի խնդիր չկար Սահմանադրական դատարանի դատավորի պաշտոնում կրկին Վահե Գրիգորյանի թեկնածությունն առաջադրելու համար:

«Մի քիչ անարդարության զգացման երևույթ կա մթնոլորտում, որովհետև նախկինում, երբ առաջադրվել էր Վահե Գրիգորյանի թեկնածությունը, ընդհամենը քվորում չլինելու հետևանքով է, որ տվյալ անձը չի անցել», - պատասխանելով լրագրողների հարցերին ասել է պատգամավորը:

Ըստ նրա՝ իրավական տեսակետից նրա թեկնածությունը կրկին առաջադրելու խնդիր չէր առաջանա և նախագահն իրավունք ուներ ևս մեկ անգամ թեկնածուին առաջադրել, որի ժամանակ արդեն կլիներ քվորում:

Նշենք, որ այս հարցի վերաբերյալ կարծիքները տարբեր են։ Փաստաբան Նորայր Նորիկյանը «Փաստինֆո»-ի հետ զրույցում կարծիք էր հայտնել, որ նույն անձը չի կարող երկրորդ անգամ առաջադրվել Սահմանադրական դատարանի դատավորի թեկնածու. «Օրենքի մեկնաբանման նշված լույսի ներքո նոր թեկնածուն ենթադրում է նոր անձ, այսինքն` եթե դատավորը չի ընտրվում, նշանակում է, որ Ազգային Ժողովը մերժել է նրան ընտրել ՍԴ դատավոր, հետեւաբար, իրավասու մարմինը պարտավոր է առաջադրել նոր թեկնածու»,- ասել էր Նորիկյանը:

Անդրադառնալով Գոռ Հովհաննիսյանի թեկնածությանը` Ն.Բաղդասարյանն ասաց, որ երկուսին էլ ճանաչում է, երկուսն էլ ունեն բարձր մակարդակի գիտելիքներ այդ պաշտոնը զբաղեցնելու համար:

Դիտարկմանն՝ արդյոք Գոռ Հովհաննիսյանի թեկնածությունը կպաշտպանվի իր թիմի կողմից և նա կընտրվի առաջադրված պաշտոնում` պատագմավորն ասաց. «Չեմ կարող պատասխանել, որովհետև ես ունեմ մեկ ձայն ու դրանով իմ գաղտնի որոշումը կկայացնեմ»:

Ավելի վաղ տեղեկացրել ենք, որ 2018 թվականի հոկտեմբերի 23-ին ԱԺ-ում գաղտնի քվեարկության ժամանակ Վահե Գրիգորյանը չէր ընտրվել ՍԴ դատավոր, քանի որ քվեարկությանը մասնակցել էր ընդամենը 53 պատգամավոր, որոնցից 23-ը դեմ էր քվեարկել:

Աղբյուր` Փաստինֆո