Փաստ ինֆո

Երեւանի ընդհանուր իրավասության դատարանում ԲՀԿ-ական պատգամավոր Էդուարդ Բաբայանի գործով այսօր մեկնարկած դատավարության ժամանակ մեղադրյալ Բաբայանը հայտարարեց, որ չի ընդունում իրեն առաջադրված մեղադրանքը: Թե ինչ պատճառաբանությամբ, մանրամասն կներկայացնի հետագայում` հարցաքննության ժամանակ, այսօր միայն հակիրճ նշեց. «Ես այդ դահլիճում չեմ եղել եւ մարդ չեմ ծեծել»:

Ավելի ուշ` լրագրողների հետ զրույցում, նա նույնը պնդեց` ասելով, որ «Օլիմպավան» մարզական համալիրում եղել է, սակայն միջադեպին չի մասնակցել. «Ես Ծառուկյանի հետ բարձրացել եմ վերեւ, նա երկու հոգու ընդունել է, մի ժամ հետո թողել, գնացել ենք»:

Մեղադրանքի համաձայն` Բաբայանի կողմից Հարությունովին մարմնական վնասվածքներ են հասցվել Գագիկ Ծառուկյանի հասցեին հայհոյանքներ հնչեցնելուց հետո: Բաբայանը, սակայն, ժխտեց նաեւ հայհոյանքներ հնչեցնելու հանգամանքը:

Հավելենք, որ գործով տուժող ճանաչված Հարությունովը իրեն տուժող չի համարում: Նա հայտարարել է, թե իրեն չեն հարվածել, այլ ինքն է սայթաքել եւ վայր ընկել:

Մանրամասները` «Փաստինֆո»-ի տեսանյութում:

Հեղինակ` Միլենա Խաչիկյան