Փաստ ինֆո

Այսօրվա ասուլիսի ժամանակ ՀՀ վարչապետ Նիկոլ Փաշինյանը , պատասխանելով այն հարցին, թե Մարտի 1-ի 10 զոհերի վերաբերյալ նոր քրեական գործ կհարուցվի թե ոչ, նշել է, որ դրա անհրաժեշտությունը չկա, որովհետեւ այն արդեն իսկ հարուցվել է։ Վարչապետի խոսքով՝ քննչական մարմինների մակարդակով արված հայտարարությունների համաձայն՝ Մարտի 1-ի այն պարկուճները, որ հայտնաբերվել են դեպքի վայրում, փոխվել են. «Դրանց փորձաքննությունը կարող էր տալ շատ հարցերի պատասխաններ, ենթադրում եմ՝ սպանությունների կոնկրետ մեղավորների բացահայտման առումով, հակառակ դեպքում ի՞նչ իմաստ ուներ փոխելը»։ Վարչապետը կարծում է, որ հնարավոր է նաեւ երկրորդ կոնցեպտը, ըստ որի՝ դա արվել է բանակի ներգրավվածությունը թաքցնելու համար. «Բայց կարող է լինել հավանական վարկած, որ այդտեղ եղել են այն պարկուճները, որոնք կապ ունեն սպանությունների հետ, եւ եթե այդպես է, նշանակում է՝ քննչական մարմինը տեղյակ է եղել, թե ովքեր են սպանողները։ Հետեւաբար՝ բոլոր մարդիկ, ովքեր նախաձեռնել են այդ փոփոխությունը, պետք է ներգավվեն ու ցուցմունքներ տան»։ Փաշինյանի խոսքով՝ եթե նույնիսկ նրանք չցանկանան դա անել, դա չի նշանակի, որ քննությունը չի շարունակվելու, եւ որեւէ կասկած չպիտի լինի, որ գործի բացահայտման համար արվելու է ամեն ինչ։

Ինչ վերաբերում է Ռոբերտ Քոչարյանի՝ Վարչապետին եւ կառավարությանը վերաբերող հայցադիմումներ դատարան ներկայացնելուն, Փաշինյանը չմեկնաբանեց՝ նշելով, որ դա յուրաքանչյուր քաղաքու իրավունքն է. «Մեր խնդիրն այն է ունենալ այնպիսի դատարան, որ թե Քոչարյանի, թե ցանկացած ուրիշի հայցը քննարկվի օրինականության սկզբունքի շրջանակում։ Մեր կառավարությունը եւ ես անձամբ հավատարիմ եմ այդ քաղաքականությունը»։ Փաշինյանը նշեց, որ որեէ գործողություն չպետք է դիտարկել անձնական պատկերացումների եւ զգացմունքների շրջանակում. այդպիսի մեկնաբանությունները դրանց հեղինակներին կխագարեն իրավիճակը օբյեկտիվ ընկալել. «Բայց ես այս այդ գործի վերաբերյալ չեմ ցանկանա շատ մեկնաբանություններ անել, որպեսզի դա ոչ մի կերպ չդիտարկվի, այսպես ասած, ուղղորդում»։

Խոսելով դատական համակարգի անկախության ու այդ ուղղությամբ տարվող բարեփոխումների մասին՝ Փաշինյանը նշեց, որ դատարաններին զանգերով ճնշելու՝ նախկինում եղած պրակտիկայի վերացումը ոչ բավարար, բայց անհրաժեշտ պայման է դատական անկախ համակարգի համար. «Եթե մենք երաշխավորենք, որ չկա իշխանական միջամտություն, ընդ որում՝ ոչ միայն իմ կողմից, եթե երաշխավորենք, որ նախկին հրահանգողները չեն օգտագործում ներկայիս ուղիները նույն ազդեցությունն ունենալու համար, եւ եթե երաշխավորենք, որ չկան կաշառքի դեպքեր, ապա դատական համակարգում կսկսվեն այնպիսի պրոցեսներ, որոնք կնպաստեն դատական համակարգի անկախությանը»։ Փաշինյանի խոսքով՝ ինքը չի կարող 100 տոկոսով ասել, թե չկան կաշառքի դեպքեր, բայց կարող է վստահեցնել, որ իրենք հնարավոր բոլոր միջոցներով անում են ամեն ինչ՝ դա բացահայտելու եւ կանխելու համար. «Մնեք խնդիր ունենք մեր դատական համակարգը բերելու եվրոպական ստանդարտի, դա է պատճառը, որ կարեւորում ենք Եվրամիության հետ մեր այս ուղղությամբ մեր համագործակցության զարգացումը, եւ մենք վճռական ենք այս հարցում. Թող ոչ ոք չմտածի, թե մենք դատական համակարգը կօգտագործենք քաղաքական նպատակներով»։

Փաշինյանի խոսքով՝ այս ուղղությամբ աշխատանքներ տարվել եւ տարվում են. «Նախորդ նիստերից մեկում իրականացրինք դատավորների սոցիալական երաշխիքներին ուղղված գործողություններ, այժմ քննարկվում է դատական համակարգը բեռնաթափելու խնդիր, միաժամանակ սկսվել է նոր օրենքների մշակման գործընթացը»։

Նիկոլ Փաշինյանը նշեց, որ Հայաստանը պետք է ունենա իրականում անկախ դատական համակարգ, եւ իրենք դրա համար գնալու են մինչեւ վերջ։

Աղբյուր` Փաստինֆո