Փաստ ինֆո

Մարտի 1»-ի գործով քննչական խմբի նախկին ղեկավար Վահագն Հարությունյանի պաշտպանի՝ ընդդեմ ՀՔԾ պետ Սասուն Խաչատրյանի ներկայացրած հայցի գործով տեղաշարժ դեռ չկա։ «Փաստինֆո»-ի հետ զրույցում պաշտպան Հարություն Հարությունյանը նշեց, որ հայցադիմումը վերադարձնելու մասին ընդհանուր իրավասության դատարանի որոշումը Վերաքննիչ դատարանի կողմից վերացնելուց հետո գործը հետ էր ուղարկվել նույն դատարան եւ մակարգվել այլ դատավորի՝ Ռուբեն Ափինյանի։  «Նիստ դեռեւս նշանակված չէ, վարույթ ընդունելու մասին որոշումն էլ դեռ չենք ստացել»,- ասաց փաստաբանը։

Նրա խոսքով՝ եթե գործն այլ դատավորի մակագրված լիներ, ապա կարող էին մտածել, թե հատուկ ձգձգում են. «Այս դեպքում չեմ ուզում այդպես մտածել, որովհետեւ Ափինյանը միշտ համարձակ հայացքներով է հանդես եկել, եւ կարծում եմ, որ զուտ ծանրաբեռնվածություն ունի»։ Փաստաբանի կարծիքով՝ հնարավոր է նաեւ՝ առողջությունն էլ դեր խաղա, որովհետեւ դատավորի մի քանի նիստ առողջական խնդիրների պատճառով հետաձգվել էր։

Ավելի վաղ հայտնել էինք, որ Վերաքննիչ քաղաքացիական դատարանը բավարարել էր «Մարտի 1»-ի գործով քննչական խմբի նախկին ղեկավար Վահագն Հարությունյանի պաշտպանի բողոքը եւ բեկանել Երեւանի ընդհանուր իրավասության դատարանի՝ ՀՔԾ պետ Սասուն Խաչատրյանի դեմ ներկայացված հայցադիմումը վերադարձնելու մասին որոշումը: 

Հիշեցնենք, որ «Մարտի 1»-ի գործով քննչական խմբի նախկին ղեկավար Վահագն Հարությունյանը, ով այժմ նույն գործով մեղադրյալ է, դատական հայց էր ներկայացրել ՀՔԾ պետ Սասուն Խաչատրյանի դեմ` պահանջելով հերքել իր մասին հնչեցրած հայտարարությունները, որոնք նա որակել էր որպես զրպարտություն:

Հեղինակ` Միլենա Խաչիկյան