Փաստ ինֆո

Իրավաբան Նորայր Նորիկյանի խոսքով` նույն անձը չի կարող երկրորդ անգամ առաջադրվել Սահմանադրական դատարանի դատավորի թեկնածու. «Օրենքի մեկնաբանման նշված լույսի ներքո նոր թեկնածուն ենթադրում է նոր անձ, այսինքն` եթե դատավորը չի ընտրվում, նշանակում է, որ Ազգային Ժողովը մերժել է նրան ընտրել ՍԴ դատավոր, հետեւաբար, իրավասու մարմինը պարտավոր է առաջադրել նոր թեկնածու»:

Բանն այն է, որ Հայաստանի Հանրապետության նախագահը մրցույթ է հայտարարել Սահմանադրական դատարանի դատավորի թափուր տեղի համար թեկնածու ընտրելու  նպատակով: Ձեւավորվել է աշխատանքային խումբ, որի ընտրած թեկնածուին էլ ՀՀ նախագահը կառաջարկի Ազգային ժողով:

Այսպես. թեկնածու դատավորներին ներկայացվող պահանջները սահմանում է ՀՀ Սահմանադրությունը։ Ըստ 165-րդ հոդվածի` Սահմանադրական դատարանի դատավոր կարող է ընտրվել քառասուն տարին լրացած, միայն Հայաստանի Հանրապետության քաղաքացի հանդիսացող, ընտրական իրավունք ունեցող, բարձր մասնագիտական որակներով և մասնագիտական աշխատանքի առնվազն տասնհինգ տարվա փորձառությամբ, բարձրագույն կրթությամբ իրավաբանը:

ՀՀ Սահմանադրության  166-րդ հոդվածը սահմանում է դատավորների ընտրության եւ նշանակման կարգը։ Ըստ դրա՝ Սահմանադրական դատարանի դատավորներին ընտրում է Ազգային ժողովը` պատգամավորների ընդհանուր թվի ձայների առնվազն երեք հինգերորդով, տասներկու տարի ժամկետով: Նշենք, որ Սահմանադրական դատարանը կազմված է ինը դատավորից, որոնցից երեքն ընտրվում են Հանրապետության նախագահի, երեքը՝ Կառավարության, երեքը` դատավորների ընդհանուր ժողովի առաջարկությամբ: Դատավորների ընդհանուր ժողովը կարող է առաջարկել միայն դատավորներ: Ընդ որում, նույն անձը Սահմանադրական դատարանի դատավոր կարող է ընտրվել միայն մեկ անգամ:

Դատավորների ընտրության բուն ընթացակարգն արդեն կարգավորվում է «ԱԺ կանոնակարգ» օրենքով: Վերջինիս 141-րդ հոդվածի 8-րդ կետի համաձայն` եթե Սահմանադրական դատարանի դատավորը չի ընտրվում, ապա քվեարկությունից հետո` տասնօրյա ժամկետում, իրավասու մարմինը առաջադրում է նոր թեկնածու:

Տվյալ պարագայում հարց էր ծագում` արդյո՞ք մեկ անգամ չընտրված թեկնածուն կարող է նորից առաջադրվել: Օրենքը, ըստ էության, դրա մասին չի խոսում: Փոխարենը նշում է, որ պետք է առաջադրել «նոր թեկնածու»: Իրավաբան Նորայր Նորիկյանը պարզաբանում է հարցը` ընգծելով, որ նոր խորհրդարան ունենալու հանգամանքը եւս անձին հնարավորություն չի տալիս երկրորդ անգամ առաջադրվել. «Կանոնակարգը չի ասում` նոր խորհրդարանն է ընտրում թե նախորդ, ասում է` եթե խորհրդարանը չի ընտրում, ապա իրավասու մարմինը պետք է ներկայացնի նոր թեկնածու»:

Հեղինակ` Միլենա Խաչիկյան