Փաստ ինֆո

Զբաղեցրած տարածքներն ազատելու «սեւ» թուղթ ստացել են ոչ միայն Բուզանդի 1/3 , այլ նաև Իսահակյան 28 հասցեի և Մամուլի շենքում տեղակայված լրատվամիջոցները։ Այդ մասին այսօր հայտարարել է  Հայաստանի ժուռնալիստների միության նախագահ Սաթիկ Սեյրանյանը։ Նրա գնահատմամբ՝ լրատվամիջոցներին փորձելով իրենց զբաղեցրած տարածքներից հանել, իշխանությունները շարունակում են նույն քաղաքականությունը, ինչն սկսել են ամիսներ առաջ՝ իշխանափոխությունից հետո:

«Այս ամենը իշխանությունների վարած նույն տրամաբանության շրջանակներում է, ինչ մամուլի նկատմամբ տեղի է ունենում իշխանափոխությունից հետո մինչ օրս. հայտարարություններ, գրառումներ, հոխորտանքներ, մամուլի դեմ արշավ։ Սա ես դիտարկում եմ այդ քայլերից մեկը», - ասաց Սեյրանյանը։

«ՀՐԱՊԱՐԱԿԻՆ» հանում են տարածքից

Նրա կարծիքով՝ նման քայլերով մամուլին փորձում են բերել իշխանական դաշտ, իսկ չհամակերպվողներին՝ դուրս մղել դաշտից ընդհանրապես։ «Սա Հայկ Մարության անձի որոշումը չէ, ո՞վ է Հայկ Մարությանը վերջին հաշվով»։

Ժուռնալիստների միության նախագահը տեղեկացրեց նաև, որ երեկ զանգահարել է քաղաքապետի ընդունարան և ակնկալել է հանդիպում-քննարկում խմբագիրների հետ։ Ընդունարանից ասել են, որ քաղաքապետը զբաղված է։

«Վերամբարձ բաներ անելուց առաջ ճիշտ է խնդիրը քննարկել գործընկերների հետ։ Վերջնագրերով խոսելը, չեմ կարծում, թե կարող է ինչ-որ լավ բանի հանգեցնել», - ասաց Ս. Սեյրանյանը։

Ավելին նա տեղեկացրեց, որ երեկ վարչապետի ընտանիքի անդամներից մեկը եւս փորձել է դասեր տալ մամուլին։

«Շատ հետաքրքիր է նկատել, որ երեկ վարչապետի ընտանիքի անդամներից ևս մեկը մամուլին փորձեց դասեր տալ ու դեղին անվանել լրատվամիջոցներին, որոնք քննադատում են իրենց ընտանիքին։ Շատ զավեշտալի էր կարդալ», - ասաց Սաթիկ Սեյրանյանը։

Աղբյուր` Փաստինֆո