Փաստ ինֆո

Օրեր առաջ հայտնել էինք, որ ՀՀ հատուկ քննչական ծառայությունը մեղադրանք է առաջադրել ԱԺ ներկայիս պատգամավոր Էդուարդ Բաբայանին՝ բռնցքամարտի աշխարհի երիտասարդական առաջնության ոսկե մեդալակիր Նիկոլայ Հարությունովի հորը՝ Վյաչեսլավ Հարությունովին ծեծելու համար։ «Փաստինֆո»-ի հարցին ի պատասխան`ՀՔԾ մամուլի քարտուղար Մարինե Օհանջանյանը տեղեկացրել էր, որ մեղադրանքն առաջադրվել է ՀՀ քրեական օրենսգրքի 112-րդ հոդվածի 1-ին մասով` ծանր մարմնական վնասվածքի պատճառելու համար: Քրեական գործը՝ մեղադրական եզրակացությամբ, ուղարկվել է դատախազություն: Մեղադրական եզրակացությունը հաստատելու մասին պաշտոնական տեղեկատվություն դեռեւս չի եղել:

Հիշեցնենք նաեւ, որ մինչ այդ` դեռ 2018 թվականի հուլիսի 5-ին, Էդուարդ Բաբայանին, ով այդ պահին չուներ պատգամավորի կարգավիճակ, մեղադրանք էր առաջադրվել ՀՀ քրեական օրենսգրքի 112-րդհոդվածի 2-րդ մասի 6-րդ կետով` ծանր մարմնական վնասվածքի պատճառում մի խումբ անձանց կողմից: Այսինքն` առաջադրված մեղադրանքը փոփոխվել է, մասնակիցների շրջանակը «սրբագրվել»: Ի սկզբանե` կիրառված բռնությանը մասնակցություն ունենալու մեջ շրջանառվում էր նաեւ Գագիկ Ծառուկյանի անունը:

ՀՔԾ-ն դատախազություն է ուղարկել ԱԺ ներկայիս պատգամավոր էդուարդ Բաբայանի վերաբերյալ գործը

Տվյալ պարագայում հարց է ծագում` ինչ է լինելու պատգամավորի անձեռնմխելիության  հետ, որքանով է այն գործելու կամ չգործելու մեղադրական եզրակացության հաստատումից հետո: Հարցի շուրջ զրուցել ենք իրավաբան Ռուբեն Մելիքյանի հետ:

-Պրն Մելիքյան, մեղադրական եզրակացության հաստատումից հետո իրավական ի՞նչ կարգավորում է ստանալու գործը, պատգամավորական անձեռնմխելիությունը այս դեպքում գործելու՞ է:

-Մենք պետք է նկատի ունենանք, որ գործ ունենք պատգամավորի անձեռնմխելիության հետ, որը սակայն տարածվում է նոր հարուցված քրեական հետապնդումների վրա, իսկ եթե գործ ունենք արդեն իսկ հարուցված եւ ընթացքի մեջ գտնվող քրեական հետապնդման հետ, այդ դեպքում անձեռնմխելիության հաղթահարման սահմանադրական մեխանիզմը գործարկելու մասին խոսք լինել չի կարող: Սահմանադրության 96-րդ հոդվածի 2-րդ մասի համաձայն` Ազգային ժողովի համաձայնությունը անհրաժեշտ է պատգամավորի նկատմամբ քրեական գործ հարուցելու, այլ ոչ թե իրականացնելու դեպքում, այսինքն` երբ պետք է զրոյից սկսել քրական հետապնդումը, իսկ եթե այն արդեն իսկ սկսված է, ապա այդ մեղադրանքի զուտ իրավական գնահատականը փոխելու դեպքում ԱԺ համաձայնության կարիք չկա:

-Այսինքն` եթե մեղադրանքը առաջադրվել է պատգամավոր դառնալուց առաջ, պատգամավորական անձեռնմխելիության հետ գործ չունե՞նք:

-Գործ չունենք այնքան ժամանակ, քանի դեռ մեղադրանքը չի փոխվում նոր արարքներ ընդգրկելու իմաստով: Պետք է նկատի ունենալ` մեղադրանքը փոխվում է իրավաբանական որակմա՞ն, թե՞ նոր արարքներ, մեղադրանքի ծավալ ընդգրկելու իմաստով: Իմ պատկերացմամբ` եթե խոսքը վերաբերեր նոր արարքներ, մեղադրանքի ծավալ ընդգրկելուն, ապա անձեռնմխելիության հաղթահարման սահմանադրական մեխանիզմը պետք է կիրառվեր: Սակայն այս դեպքում խոսքը վերաբերում է նույն արարքի` իրավաբանական այլ որակում տալուն, հետեւաբար` ես չեմ կարծում, թե անհրաժեշտություն կա գործարկելու անձեռնմխելիության հաղթահարման սահմանադրական մեխանիզմը: Սահմանադրությունը հիշատակում է նոր քրեական հետապնդման մասին, սակայն իրավական գնահատականի փոփոխությունը չի համարվում նոր քրեական հետապնդում:

-Փաստորեն, դատավճռի ուժի մեջ մտնելուց հետո պատգամավորը առանց որեւէ խնդրի կարող է ազատազրկվե՞լ:

-Այո, ԱԺ Կանոնակարգի 29-րդ գլխի 154-րդ հոդվածի 4-րդ կետի համաձայն` պատգամավորի լիազորությունները դադարեցվում են  նրան ազատազրկման դատապարտելու վերաբերյալ դատավճիռն օրինական ուժի մեջ մտնելու պահից: Իսկ մինչ այդ անմեղության կանխավարկածի շրջանակներում անձը ունի լրիվ նույն կարգավիճակը, ինչ ցանկացած ուրիշ մեկը:

Հ.Գ.Էդուարդ Բաբայանը համարվել է Գագիկ Ծառուկյանի թիկնապահը եւ մշտապես նրան ուղեկցել հանդիպումների ժամանակ։ Քննության ընթացքում Էդուարդ Բաբայանը սակայն ներկայացել է որպես ԱՕԿ նախագահ Գագիկ Ծառուկյանի խորհրդական։ Իսկ հարուցված քրեական գործն էլ չխանգարեց, որ նա առաջադրվի որպես պատգամավորի թեկնածու եւ ընտրվի պատգամավոր։ ԱԺ կայքում հրապարակված պաշտոնական կենսագրական տվյալների համաձայն՝ Էդուարդ Բաբայանը Ծառուկյանի խորհրդական աշխատելուն զուգահեռ եղել է նաեւ ՀՀ ոստիկանության կազմակերպված հանցավորության դեմ պայքարի գլխավոր վարչության՝ 6-րդ վարչության աշխատակից։ 

Լուսանկարում` իրավաբան Ռուբեն Մելիքյանը

Հեղինակ` Միլենա Խաչիկյան