Փաստ ինֆո

Փետրվարի 12-ին հայտնի դարձավ, որ Հատուկ քննչական ծառայությունը նոր մեղադրանք է առաջադրել  ՀՀ երկրորդ նախագահ Ռոբերտ Քոչարյանին: Այսպիսով, բացի սահմանադրական կարգի տապալումից,  Քոչարյանը մեղադրվում է ՀՀ քրեական օրենսգրքի 311-րդ հոդվածի  4-րդ մասի  2-րդ կետով՝ առանձնապես խոշոր չափի կաշառք ստանալու մեջ: Նոր մեղադրանքի հիմքում ընկած է գործարար Սիլվա Համբարձումյանի կողմից՝ ենթադրյալ կաշառք տալու հայտարարությունը:

Մինչդեռ, Սիլվա Համբարձումյանն այսօր մի քանի լրատվամիջոցի հետ զրույցում հայտարարել է, թե ինքը երբևէ ցուցմունք չի տվել երկրորդ նախագահի դեմ: Ըստ նրա ցուցմունքի, 2008թ.-ին 2 մլն դոլար է փոխանցել գործարար Սամվել Մայրապետյանին երկրի այն ժամանակվա իշխանությանը կաշառք տալու համար, որպեսզի վերջիններս չխոչընդոտեն իր բիզնեսին: Սակայն տիկինը չի հիշում՝ ինչ գործարքի մասին է խոսքը և տեղյակ չէ՝ արդյոք Մայրապետյանը ենթադրյալ կաշառքը փոխացնել է Քոչարյանին, թե ոչ:

Սիլվա Համբարձումյանն այն կինն է, ով հաղորդում է ներկայացրել  Հայաստանի մի շարք նախկին պաշտոնյաների դեմ՝ հայտնելով խոշոր չափի կաշառք տալու մասին: Սակայն մինչ օրս նրա հաղորդումների վերաբերյալ որևէ հիմնավոր փաստ առկա չէ: Ավելին՝ նշենք, որ կաշառք տալը եւս հանցագործություն է՝ նախատեսված ՀՀ քրեական օրենսգրքի 312-րդ հոդվածով,  սակայն  ՀՔԾ-ն չի մանրամասնում, թե արդյոք բոլորին կաշառք տված կնոջը եւս մեղադրանք առաջադրվել է։

«Վաստակավոր կաշառատուի» համբավ ձեռք բերած տիկնոջը սոցցանցում անգամ իշխանության ներկայացուցիչներն են հեգնում՝ գրելով եթե մի օր էլ Համբարձումյանն իրենց դեմ նույնաբովանդակ հաղորդում ներկայացնի, ապա իրենք նախապես հերքում են և հայտնում, որ նրան չեն ճանաչել:

Քոչարյանին նոր մեղադրանք առաջադրելու մասին տեղեկության հրապարակումից հետո, կասկածներ առաջացան, որ Փաշինյանի իշխանությունը նոր հիմքեր է փնտրում Քոչարյանի կալանքը երկարաձգելու համար, քանի որ, ըստ էության, տապալել է Մարտի 1 գործի քննությունը: Հայտնի դարձավ, որ մեղադրանքի հիմքում Սիլվա Համբարձումյանի ցուցմունքն է, ով կարծես դարձել է ներկայիս իշխանությունների փրկօղակը՝ քաղաքական հակառակորդներին կալանքի տակ պահելու համար։ Սակայն անգամ նա հայտարարեց, որ ցուցմունք չի տվել Քոչարյանի դեմ։ Արդեն կասկած չկար, որ ՀՔԾ-ն ցայտնոտի մեջ է, և Հայաստանի իրավապահ համակարգը, մեղմ ասած,  զավեշտալի իրավիճակում է հայտնվել:

Բանն այն է, որ դեռևս 2018թ.-ի օգոստոսի 17-ին կառավարման 100 օրին նվիրված հանարահավքում Նիկոլ Փաշինյանը հայտարարեց, թե Մարտի 1-ի գործը բացահայտված է: Մինչդեռ անցել է ավելի քան 8 ամիս, սակայն այդպես էլ պարզ չէ՝ ովքեր են եղել 10 անձանց  սպանության հեղինակները և որևէ հստակություն չկա գործի հանգամանքներում:

Փաստերի և ապացույցների անբավարարությանը զուգահեռ, իշխանությունն այս ընթացքում ամեն ինչ արել է մարտյան ողբերգության թեման հանրության ուշադրության կենտրոնում պահելու համար: Դեռևս օգոստոսին իրավապահները հայտարարություն տարածեցին, թե նախկին վարչապետ Հովիկ Աբրահամյանի ընտանիքին պատկանող տարածքներում զենքեր են հայտնաբերվել, որոնք, ըստ օպերատիվ տեղեկությունների,  օգտագործվել են մարտի 1-ի դեպքերի ժամանակ: Ամիսներ անց, սակայն, փորձաքննությունը պարզեց, որ այդ զենքերը որևէ առնչություն չեն ունեցել մարտի 1-ի իրադարձությունների հետ: Մինչդեռ իշխանությունը, ըստ երևույթին, միտումնավոր կերպով շրջանառության մեջ դրեց թեման՝ նախընտական շրջանում հանրային հուզումներ առաջացնելու և նախորդ իշխանության ներկայացուցիչների նկատմամբ մարդկանց վրդովմունքը խորացնելու համար: Ցավալի է, բայց փաստ, որ Նիկոլ Փաշինյանի իրավապահ համակարգը շահարկեց ողբերգական դեպքերը քաղաքական դիվիդենտներ ստանալու համար:

Բայց սա դեռ ամենը չէ. մարտի 1-ի գործով Քոչարյանի մեղավորության փաստը պնդող բոլոր անձիք բարձր պաշտոններ ստացան Նիկոլ Փաշինյանի կողմից:

Օրինակ՝ գեներալ Արշակ Կարապետյանն, ով 2016թ.-ի ապրիլյան պատերազմից հետո հեռացվել էր բանակից, Ռոբերտ Քոչարյանի դեմ ցուցմունք տալուց հետո նշանակվեց Նիկոլ Փաշինյանի խորհրդական:

Մարտի 1-ի փաստահավաք խմբի ղեկավար Անդրանիկ Քոչարյանը, ում անունն անցնում է տարբեր խորհրդավոր սպանություններով եւ ինքնասպանություններով, Փաշինյանի «Իմ քայլ» դաշինքի ցուցակով ընտրվեց պատգամավոր՝ դառնալով ԱԺ Ներքին գործերի և անվտանգության հարցերիմշտական հանձնաժողովի նախագահը:

Լոռու նախկին փոխմարզպետ Արամ Խաչատրյանն, ով հայտարարում է, թե բանակը մասնակցել է մարտի 1-ի իրադարձություններին, դարձյալ «Իմ քայլ» դաշինքի ցուցակով  պատգամավոր դարձավ: Մարտյան իրադարձությունների արդյուքնում զոհված Գոռ Քլոյանի հայրը՝ Սարգիս Քլոյանը, որը, նախագահ Քոչարյանին է վերագրում ողբերգական դեպքերի ողջ պատասխանատվությունը, Փաշինյանի «Քաղաքացիական պայամանագիր» կուսակցության հոբաբարձուների խորհրդի անդամ է: Այսպիսի բազում այլ օրինակներ կան:

Հատկանշական է, որ Փաշինյանի անմիջական շրջապատից զատ որևէ մեկը՝ անգամ նախկին իշխանությունների հետ լրջագույն հակասություն ունեցած պաշտոնյաններից ու զինվորականներից, որևէ հրապակային հաղորդում կամ հայտարարություն չեն արել ընդդեմ Ռոբերտ Քոչարյանի:

Այսպիով, Նիկոլ Փաշինայանն ու նրա իրավական համակարգը Մարտի 1-ի գործը մտցրել են փակուղի՝ իրենց իշխանության մեջ տեղավորելով իրենց տեսակետը պաշտպանող բոլոր անձանց: Կասկած չկա, որ քրգործի տապալումն ու Քոչարյանին կալանքի տակ պահելու հիմքերի փնտրտուքն է ստիպել ՀՔԾ-ին նոր մեղադրանք առաջադրել երկրորդ նախագահին: Մեղարդանք, որի հիմնական գործող անձը պնդում է, որ ցուցմունք չի տվել Քոչարյանի դեմ, տեղյակ չէ նրան գումար փոխանցվել է, թե ոչ և «չի հիշում» ինչ գործարքի համար է 2 մլն դոլար կաշառք փոխանցել: Համաձայնեք, որ ծիծաղելի է:

Հետգրություն

Մարտի 1-ի դեպքերի բացահայտումն ու դեպքերի արդար քննությունը անհերքելի անհրաժեշտություն է: Իսկ արդար քննությունը հնարավոր է միայն միջազգային անկախ քննչական խմբի ներգրավվաման միջոցով, ինչից համռորեն խուսափում է նոր իշխանությունը: Կա ձևավորված կարծիք, որ գործող իշխանությունը՝ Նիկոլ Փաշինյանի գլխավորությամբ, ընդամենը վրեժ է լուծում Ռոբերտ Քոչարյանից: Թե ինչ ընթացք կունենա քրգործը, ցույց կտա ժամանակը: Միայն փաստ է այն, որ Քոչարյանի պաշտպանները Եվրոպական դատարան են ներկայացվել մի շարք դիմումներ, որոնց քննության ընթացը, ըստ մասնագետների,  դժվար թե ուրախացնի ՀՔԾ-ին ու անձամբ Փաշինյանին:

Հեղինակ` Բադալ Հակոբյան