Փաստ ինֆո

Դատավորների ընդհանուր ժողովի կարգապահական հարցերի հանձնաժողովը չի շտապում քննության առարկա դարձնել Երեւանի ընդհանուր իրավասության դատարանի դատավոր Արտուշ Գաբրիելյանի նկատմամբ կարգապահական վարույթ հարուցելու միջնորդությունը։

«Փաստինֆո»-ի փոխանցմամբ՝ նման հաղորդում ներկայացրել էր «Մարտի 1»-ի քրեական գործով քննչական խմբի նախկին ղեկավար Վահագն  Հարությունյանի փաստաբանը՝ դեռեւս հունվարի 11-ին, երբ հայտնի դարձավ, որ դատարանը՝ դատավոր Արտուշ Գաբրիելյանի նախագահությամբ,  30.12.18 թ.  դատական նիստում քննարկել է Վ.Հարությունյանին կալանավորելու վերաբերյալ ՀՔԾ քննիչի միջնորդությունըառանց պաշտպանական կողմի մասնակցության և բավարարել այն։

Փաստաբան Միհրան Պողոսյանը համոզված է, որ դատավոր Արտուշ Գաբրիելյանի նախագահությամբ 30.12.2018թ. կայացված որոշմամբ խախտվել է «Մարդու իրավունքների և հիմնարար ազատությունների պաշտպանության մասին» եվրոպական կոնվենիցայի, ՀՀ Սահմանադրության, ՀՀ քրեական դատավարության օրենսգրքի, ՀՀ դատական օրենսգրքի բազմաթիվ դրույթները, որոնք ազդել են գործի ելքի վրա և խաթարել են արդարադատության բուն էությունը:

Մասնավորապես՝ դատարանը Վահագն Հարությունյանի պաշտպան Միհրան Պողոսյանին պատշաճ կերպով չի ծանուցել  նշանակված դատական նիստի տեղի և ժամանակի մասին՝ այդպիսով թույլ տալով մրցակցության սկզբունքի խախտում, ինչն էլ իր հերթին հանգեցրել է ՀՀ Սահմանադրությամբ, եվրոպական կոնվենցիայով և ՀՀ քրեական դատավարության օրենսգրքով երաշխավորված արդար դատական քննության իրավունքի խախտմանը։

Փաստաբանը խնդրել է Դատավորների ընդհանուր ժողովի կարգապահական հարցերի հանձնաժողովին՝ Երևանի ընդհանուր իրավասության դատարանի դատավոր Արտուշ Գաբրիելյանի նկատմամբ հարուցել  կարգապահական վարույթ եւ նրան կարգապահական պատասխանատվության ենթարկելու միջնորդությամբ դիմել բարձրագույն դատական խորհրդին:

«Փաստինֆո»-ի հարցին ի պատասխան փաստաբանը հայտնեց, որ կարգապահական հանձնաժողովից առայժմ որեւէ պատասխան չի ստացել հաղորդման քննարկման արդյունքների մասին։

Նշենք, որ մինչ հանձնաժողովը քննարկում է վարույթ հարուցելու հարցը՝ փաստաբանը բացահայտել է մեկ այլ ապօրինություն՝ թույլ տրված դատարանի կողմից։ Մասնավորապես վերաքննիչ քրեական դատարանում սկսվել է Վ.Հարությունյանին կալանավորելու Երեւանի ընդպանուր իրավասության դատարանի նշված որոշման դեմ պաշտպանական կողմի վերաքննիչ բողոքի քննարկումը եւ փետրվարի 1-ին տեղի ունեցած դատական նիստում փաստաբանը բացահայտել է, որ դատարանը կեղծիք է կատարել։  «Վերաքննիչ դատարանում ծանոթացա, թե  իբր, գործում առկա է հեռախոսագիր այն մասին, որ ինձ հետ փորձել են կապվել, և ես չեմ պատասխանել հեռախոսազանգին»,-  ասել է  Միհրան Պողոսյանը՝  փաստելով, որ դա ակնհայտ կեղծիք է։ Ավելին՝ ըստ նրա,  եթե անգամ փորձեին հեռախոսազանգի միջոցով կապ հաստատել իր հետ  և ինքը հեռախոսազանգերին չպատասխաներ, ապա իրավական առումով դա որևէ նշանակություն չէր ունենա, քանի որ դա չի կարելի համարել պատշաճ ծանուցել  նիստի մասին:

Պաշտպանական կողմը պատրաստվում է պաշտոնեական կեղծիք կատարելու վերաբերյալ հաղորդում ներկայացնել իրավապահներին։

Աղբյուր` Փաստինֆո