Փաստ ինֆո

Այս իշխանություններին չենք թողնելու մենակ վայելելու իրենց կողմից ստեղծված մենիշխանական քաղաքական բուրգը. ժողովուրդն իր մտահոգությունները, խնդիրներն ու դարդերը բարձրաձայնելու է նաև մեր շուրթերով, ֆեյսբուքյան իր էջում ասել է ՀՀԿ փոխնախագահ Արմեն Աշոտյանը՝ պնդելով, որ ՀՀԿ շարունակելու է մնալ քաղաքական օլիմպոսում, քանի որ ունի առաքելություն:

«Մեզ սատարող մարդիկ գուցե մի քիչ հիասթափված են ընտրության արդյունքներից, բայց քաղաքական պայքարը չի սահմանափակվում ԱԺ ամբիոնով կամ դահլիճով: ՀՀԿ-ն նորացված, թարմացված, լիցքավորված, համալրված բազում նոր կողմնակիցներով՝ իր քաղաքական ծանրկշիռ դերակատարումն ունենալու է երկրում: Ընտրությունները ցույց տվեցին, որ ՀՀ մոտ 7 տասնյակ կուսակցությունների մեջ մենք 4-րդն էինք: Մենք մեր տեղը ձեր 60.000 քվեների շնորհիվ պնդացրեցինք քաղաքական դաշտում՝ անկախ նրանից մենք խորհրդարանում ենք, թե ոչ», - ասել է նա:

Աշոտյանը հաջողություն է մաղթել նոր ԱԺ-ին և նոր կառավարությանը՝ նշելով, որ այսօրվա իշխանությունը մենակ է մնացել ՀՀ առջև կանգնած բազմաթիվ մարտահրավերների հետ:

ՀՀԿ փոխնախագահը նաև հատուկ շնորհակալություն է հայտնել իր ընտրազանգվածին՝ նշելով.

«Կարող եք  վստահել մարդկանց, որոնց գուցե ամիսներ կամ շաբաթներ առաջ չէիք սիրում, իսկ այսօր որոշակի քաղաքական հույսեր և գնահատական եք կապում: Շնորհակալ եմ, որ ձեր ձայների շնորհիվ ես շատ ավելի մեծ քվե ստացա, քան բազմաթիվ այն քննադատներ, որոնք կարծում էին, որ անգամ մեր հարազատները մեզ չեն քվեարկելու: Ես ունեմ առնվազն 2396 բացահատված հարազատ այս ընտրատարածքում»:

Աղբյուր` Փաստինֆո