Փաստ ինֆո

Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը հիմնավորված է համարել սպանված աներորդու կնոջը գաղտնալսելու համար երևանցի Արթուր Խաչատրյանին առաջադրված մեղադրանքը։

Ավելի վաղ տեղեկացրել ենք, որ Արթուր Խաչատրյանը, նպատակ ունենալով տեղեկություններ հավաքել իր կնոջ եղբոր` Սամվել Շահվերդյանի սպանության դեպքի վերաբերյալ, վերջինիս կնոջ բնակարանի խոհանոցում գտնվող գազի անվտանգության ձայնաազդանշանային սարքի մեջ 02.02.2016թ. տեղադրել է «N9» տեսակի «GSM» թրեքեր, որը շահագործելով առանց Լիանա Հարությունյանի համաձայնության՝ օրենքով չնախատեսված եղանակով 02.02.2016-19.09.2016թ. ընկած ժամանակահատվածում գաղտնալսելու միջոցով հավաքել է նրա և նրա ընտանիքի անդամների անձնական և ընտանեկան գաղտնիք համարվող տեղեկություններ: Նրան մեղադրանք է առաջադրվել ՀՀ քրեական օրենսգրքի 144-րդ հոդվածով։

Գործով դատավարությունն ավարտվել է եւ առաջին ատյանի դատարանի դատավճռով տղամարդը դատապարտվել է կալանքի՝ մեկ ամիս ժամանակով, իսկ վերաքննիչ բողոքները մերժվել։

Թե նախաքննության եւ թե դատաքննության ընթացքում տղամարդն ընդունել է առաջադրված մեղադրանքը, բայց եթե դատարանում հրաժարվել է ցուցմունք տալ, ապա նախաքննության ընթացքում պատմել է նման արտասովոր քայլի գնալու պատճառը. պարզվում է  դեռեւս 2007 թվականին սպանված աներորդու սպանության մեջ Ա.Խաչատրյանը տարիների ընթացքում սկսել կասկածել նրա կնոջը։

 Ըստ նրա՝ կնոջ եղբոր՝ Սամվել Շահվերդյանի, հետ գտնվել է եղբայրական հարաբերությունների մեջ: Միասին շահագործել են Երևան քաղաքի Մերգելյանի անվան ինստիտուտի դիմացի հատվածում տեղակայված «Թագ» սրճարանը, որը պատկանում է կնոջը, ով հանդիսանում է  նաեւ ՍՊ ընկերության հիմնադիրը:

2007թվականի ապրիլի 28-ի երեկոյան՝ ժամը 23-ի սահմաններում, Սամվելը դուրս է եկել  իրենց  սրճարանից՝ ասելով, որ տուն է գնում , իսկ10 րոպե անց  զանգահարել է Սամվելի կինը և ասել, որ շենքի շքամուտքում նրան սպանել են: Անմիջապես վազելով գնացել է այնտեղ ու  տեսել, որ Սամվելն ընկած է:

Ըստ Արթուր Խաչատրյանի՝ իր մոտ դեռ վաղուց կասկածներ են եղել այն մասին, որ Սամվելի կինը հնարավոր է որևէ առնչություն ունի ամուսնու սպանության հետ, այդ իսկ պատճառով որոշել է ձեռքի տակ գտնվող գաղտնալսող սարքը օգտագործել որևէ տեղեկություն ստանալու նպատակով:  Նախ որդու միջոցով բջջային հեռախոսաքարտ է ձեռք բերել, որը  նշված սարքի մեջ, որից հետո հյուր է գնացել աներորդու, զննել բնակարանը, թե տան որ հատվածում է ավելի նպատակահարմար տեղադրել այն  և որոշել, որ ամենահարմարը  խոհանոցն է՝ գազի անվտանգ շահագործման համար նախատեսված սարք: Օգտվելով այն հանգամանքից, որ տանտիրուհին  բողոքել է գազի սպասարկման հետ կապված՝ ինքն էլ ասել է, որ միգուցե դա պայմանավորված է հիշյալ սարքի խափանված լինելու հանգամանքով, որից հետո ասել է, որ այդ սարքը կտանի և կփոխի, ինչն էլ արել է և մի քանի օր անց։ Մասնավորապես՝  գնել է գազի անվտանգ շահագործման համար նախատեսված սարք, դրա մեջ տեղադրել գաղտնալսող սարքը, ապա տարել տուն ու փոխել հնի հետ։  Բջջային հեռախոսահամարներով պարբերաբար զանգահարել է գաղտնալսող սարքի մեջ տեղադրված հեռախոսահամարին և լսել  տանը տեղի ունեցած խոսակցությունները։   2016թվականի օգոստոս ամսին, հասկացել է, որ այդ սարքը չի աշխատում, դիմել է իր վաղեմի ծանոթ, մասնագիտությամբ երաժիշտ-նվագող, Նոր Նորքի բնակչին, որ  գնա սպանված աներորդու կնոջ  տուն ու հանի գազի անվտանգ շահագործման համար նախատեսված սարքը, բերի տա իրեն, որ այն փոխարինի ինքը, քանի որ այդ ընթացքում հարաբերությունները լարվել էին եւ ինքը նրանց տուն չէր այցելում: Երկրորդ անգամ արդեն չի կարողացել փոխել սարքը, քանի որ տանտիրուհին սկսել է ինչ-որ բան կասկածել եւ թույլ չի տվել, որ մտնեն տուն եւ սարքի հետ ինչ-որ բան անեն։

Գաղտնիքը բացահայտվել է ու հարուցվել քրեական գործ։ Արթուր Խաչատրյանն ընդունել է առաջադրված մեղադրանքը, բայց չի զղջացել ու հրաժարվել գաղտնալսման միջոցով իրեն հայտնի դարձած հանգամանքների մասին պատմել ։

 Նշենք, որ խոսքը գնում է հանցագործ աշխարհում որպես հեղինակություն հայտնի «Մերգելյանցի Սամվելիկ» կամ «Բարեց Սամվելիկի»  սպանության մասին, որը տեղի է ունեցել 2007 թվականի ապրիլի 28-ին։ Նրա անունը կապվում էր ԱԺ նախկին  պատգամավոր  Լեւոն Սարգսյանի՝ «Ալրաղացի Լյովիկի» անվան հետ:

Սպանության մասին ահազանգն ոստիկանությունում ստացվել է ապրիլի 28-ին՝  ժ. 23:15-ի սահմաններում,  առ այն , որ Կոմիտաս պողոտայի թիվ 1 շենքի բակում կրակոցներ են հնչում: Դեպքի վայր մեկնած օպերատիվ-քննչական խումբը պարզել է, որ ժ. 23:00-ի սահմաններում ու դիմակավորված անձը կամ անձինք ավտոմատ ինքնաձիգից կրակահերթ են արձակել եւ սպանել են 1966թ. ծնված, նախկինում սպանության համար դատապարտված Սամվել Նորիկի Շահվերդյանին՝  «Մերգելյանցի Սամվելիկին»:  Դեպքի վայրի  զննությամբ  հայտնաբերվել եւ առգրավվել է 10 հատ 9 մմ տրամաչափի ավտոմատի պարկուճներ եւ մեկ հատ գնդակ: Ըստ նախաքննության վարկածի՝ սպանությունը կատարվել է թիկունքից, երբ Ս. Շահվերդյանը մոտեցել է այն շենքին, որտեղ բնակվում է: Մամուլն այն ժամանակ գրել էր, որ  նրա հետ է եղել նաեւ հայրը, որի ուղղությամբ, սակայն, կրակ չի արձակվել, եւ նա չի տուժել եւ կարծիք կա, որ սպանությունն իրականացրել էին պրոֆեսիոնալ  քիլլերները։

Փամփուշտները եղել են «Մակարով» տեսակի ատրճանակի փամփուշտներ, բայց քանի որ սպանությունը կատարվել է ավտոմատ հրազենով, կարծիք կա, որ սպանության գործիք հանդիսացող զենքը եղել է «Շմայս» տեսակի ավտոմատ, որն արտադրվում էր 90-ականներին Հրազդանում, եւ որը լիցքավորվում էր հենց «Մակարովի» փամփուշտներով: Նշենք, որ ցայսօր սպանված Ս.Շահվերդյանի կնոջ եւ ընտանիքի մյուս անդամների, այդ թվում քրոջ ընտանիքի միջեւ կան գույքային տարաձայնություններ։

Պատրաստեց՝ Քրիստինե Հարությունյանը

Աղբյուր` Փաստինֆո