Փաստ ինֆո

Նուբարաշենի խճուղում տեղի ունեցած լեզվաբան Փառանձեմ Մեյթիխանյանի ամուսնու՝ Եղիշե Խաչատրյանի սպանության գործով այսօրվա նիստին չէին ներկայացել կողմերը։ Ամբաստանյալները ՔԿՀ-ից չէին բերվել, տուժողի իրավահաջորդը չէր եկել, չէին ներկայացել նաեւ պաշտպաններից երկուսն ու մեղադրող դատախազ Վարդգես Սարգսյանը: 

Նիստին մասնակցում էին միայն դատավարության այն մասնակիցները, որոնք չէին տեղեկացվել նիստը հետաձգելու դատավոր Աննա Դանիբեկյանի  որոշման մասին: 

Դատական նիստի մեկնարկին դատավորն ընթերցեց տուժող Եղիշե  Խաչատրյանի իրավահաջորդի ներկայացուցիչ Ինեսսա Պետրոսյանի դիմումն առ այն, որ  քննչական գործողության մասնակցելու պատճառով  չի  ներկայանալու դատական նիստին ու  խնդրել էր հետաձգել այն: Բացի այդ՝  փաստաբանը տեղեկացրել էր, որ սեպտեմբերի 13-26-ը գտնվելու է արձակուրդում և դատարանին խնդրել էր հաջորդ դատական նիստը նշանակել սեպտեմբերի 26-ից հետո: 

Դատավոր  Աննա Դանիբեկյանը  պատրաստվում էր հետաձգել նիստը, երբ դատարան ներկայացած գործով երեք պաշտպանները՝ Միհրան Պողոսյանը, Լիպարիտ Սիմոնյանն ու Վաչագան Քոսյանը դատարանից պահանջեցին պարզաբանել այսօրվա նիստի հետաձգման պատճառի, այդ մասին կողմերից ոմանց մասին  նախապես տեղյակ պահելու, իսկ իրենց  չտեղեկացնելու վերաբերյալ:

Դատավոր Աննա Դանիբեկյանը պատասխանեց, թե դատավարության մասնակիցները դատարանի աշխատակազմից են տեղեկացել նիստի հետաձգման մասին: 

Լիպարիտ  Սիմոնյանն ընդգծեց, որ դատավարության այլ մասնակիցների՝ նույնիսկ 5 րոպե ուշանալը դատարանի կողմից քննարկման առարկա է դառնում, սակայն դատարանն  այժմ անտեսել է այն հանգամանքը, որ տուժողի իրավահաջորդի ներկայացուցչի չներկայանալը  դատական նիստը  հետաձգելու հիմք չէ,  և որ նրա բացակայության պայմաններում նիստը հետաձգելու կամ շարունակելու հարցը պետք է քննարկվեր դատական նիստի ժամանակ։ Մինչդեռ  դատարանը  նախապես որոշել է հետաձգել նիստը՝  այդ մասին տեղյակ  պահելով նաև քրեակատարողական ծառայությունը, որպեսզի ամբաստանյալները դատարան չբերվեն: 

Ի պատասխան՝ Աննա Դանիբեկյանը պարզաբանեց, որ մեղադրողը նույնպես  չէր ներկայանալու դատարան, և նրա բացակայությամբ նիստ լինել չէր կարող, ուստի դատարանի աշխատակազմն այս պատճառով է  քրեակատարողական ծառայությանը տեղյակ պահել, որ ամբաստանյալները չբերվեն: 

Դատարանի  վերը նշված պարզաբանումից հետո Միհրան Պողոսյանը միջնորդեց դիմել գլխավոր դատախազին, որպեսզի քննարկվի մեղադրող դատախազի դատարան չներկայանալու հարցը: 

«Ես  վստահ եմ,  որ դատարանը նման բան չի անի, քանի որ համոզված եմ՝ դատարանն է մեղադրողին հայտնել, որ այսօրվա նիստին չներկայանա»,- ասաց Միհրան Պողոսյանը՝ նշելով, որ դատարանը դատական նիստերից դուրս, Քրեական դատավարության օրենսգրքով չսահմանված  որոշումներ է կայացնում: 

«Դատարանը, քրեական դատավարության օրենսգրքի նորմերի անտեսմամբ, կրկին հագուրդ տալով տուժողի ներկայացուցչի ցանկություններին, ինքնուրույն զանգում է դատախազություն ու դատախազին ասում, որ նիստի չգա, քրեակատարողական ծառայությանն էլ հայտնում, որ կալանավորներին դատարան չներկայացնեն: Ես դատարանին կոչ եմ անում վերադառնալ Քրեական դատավարության օրենսգրքի դաշտ»,- հայտարարեց Միհրան Պողոսյանը: 

Գլխավոր դատախազին դիմելու վերաբերյալ փաստաբանի միջնորդությունը դատարանը մերժեց: 

«Ձեր միջնորդությունը չի կարող բավարարվել: Դատարանին հայտնի չեն մեղադրողի բացակայության պատճառները, բայց դատախազին դիմելու կարիք չկա. մեղադրողն ինքը կհայտնի բացակայության պատճառը»,- ասաց Աննա  Դանիբեկյանն ու հետաձգեց դատական նիստը:

Եղիշե Խաչատրյանի  սպանությունը տեղի է ունեցել 2016թ. հունիսի 4-ին՝ Նուբարաշենի խճուղում:

Ըստ մեղադրանքի` սպանված Եղիշե Խաչատրյանը երթևեկության կանոնները խախտելու համար նկատողություն է արել ամբաստանյալներ Յուրի Հակոբյանին, Արտաշես Չիչոյանին ու Արարատ Նիկողոսյանին, որից հետո վերջիններս նրան հայհոյել են, ծեծել, ապա դեպքի վայր են եկել Արթուր Զաքարյանը, Խաչիկ Կոսյանը և ինքնությունը չպարզված ևս մեկ անձ, ու մոր աչքի առաջ դաժանաբար ծեծել 58-ամյա տղամարդուն, ով ստացած վնասվածքներից մահացել է։ Գործով մեղադրանք է առաջադրվել 5 անձի՝ Արտաշես Չիչոյանին, Արարատ Նիկողոսյանին, Խաչիկ Կոսյանին, Արթուր Զաքարյանին ու Յուրի Հակոբյանին:

Նշենք, որ ամբաստանյալ Արարատ Նիկողոսյանը օրեր առաջ Նուբարաշեն քրեակատարողական հիմնարկում մահացել է, դիահերձման արդյունքներով նրա մոտ արձանագրվել է թույլ սրտային անբավարարություն:

Աղբյուր` Փաստինֆո