Փաստ ինֆո

«Գյումրու Մ.Նալբանդյանի անվան պետական մանկավարժական ինստիտուտ» ՊՈԱԿ-ում շրջանավարտներից խաբեությամբ գումար հափշտակելու գործի շրջանակներում ինստիտուտի նախկին պրոռեկտոր Անահիտ Ֆարմանյանը կասկածյալի կարգավիճակում ծանուցվել է, սակայն չի ներկայացել նախաքննական մարմին, ինչից հետո որոշում է կայացվել նրան բերման ենթարկելու, ապա նաև հետախուզում հայտարարելու մասին: 

«Փաստինֆո»-ի հարցմանն ի պատասխան՝ Քննչական կոմիտեից հայտնեցին, որ 2018 թվականի հուլիսի 30-ին և 31-ին ծանուցագրեր են ուղարկվել Ա.Ֆարմանյանին, իսկ օգոստոսի 1-ին որոշում է կայացվել նրան բերման ենթարկելու մասին, սակայն որոշման պահանջը հնարավոր չի եղել կատարել՝ վերջինիս չհայտնաբերելու պատճառով:

Իսկ օգոստոսի 7-ին որոշում է կայացվել Ֆարմանյանին ՀՀ քրեական օրենսգրքի 178-րդ հոդվածի 3-րդ մասի 1-ին կետով որպես մեղադրյալ ներգրավելու, ապա որոշում է կայացվել՝ Ա.Ֆարմանյանի նկատմամբ հետախուզում հայտարարելու մասին:

Միևնույն ժամանակ ՔԿ-ից նաև տեղեկացանք, որ Ֆարմանյանի պաշտպանը ևս հեռախոսազանգի միջոցով տեղեկացել է Ֆարմանյանի՝ որպես կասկածյալ դատավարական կարգավիճակում պլանավորված քննչական գործողությունների մասին և հրավիրվել է վարույթն իրականացնող մարմին, ինչից հետո նախաքննական մարմինը տեղեկություններ է ստացել, որ հուլիսի 30-ին` ժամը 21:56-ին, Ֆարմանյանը հատել է ՀՀ պետական սահմանը «Բավրա» սահմանային կետով` դուրս գալով Հայաստանի Հանրապետությունից:

Եվ միայն 2018թ. օգոստոսի 7-ին վարույթն իրականացնող մարմինը որոշում է կայացրել՝ Ա.Ֆարմանյանին ՀՀ քրեական օրենսգրքի 178-րդ հոդվածի 3-րդ մասի 1-ին կետով որպես մեղադրյալ ներգրավելու մասին և նրա նկատմամբ հայտարարել հետախուզում: 

Հետախուզման մեջ գտնվող Ֆարմանյանը հայտարարությամբ է հանդես եկել որում նշում է. «Մեծ է գայթակղությունը՝ անդրադառնալու հարուցված քրեական գործի բոլոր դրվագներին, խորհրդային լավագույն ավանդույթներով կայացված գիշերային որոշումներին, իմ՝ իբրև «քննությունից թաքնվելուն», ինձ կալանավորելու որոշմանն ու հայտարարված հետախուզմանը, դրա հանրայնացման «սարսափազդու» եղանակին, Կրթության և գիտության նախարարի անհավասարակշիռ արձագանքին և այլն (անճաշակ սերիալ հիշեցնող այս ամենի իրավական ասպեկտներին անդրադարձ կլինի իմ փաստաբանների կողմից)։

Բայցև, դրա կարիքը ամնեևին չկա, քանի որ իմ մայր համալսարանի աշխատակիցների, համաքաղաքացիների ու ուսանողների, հարուցված գործին քաջածանոթների համար ամեն ինչ պարզ է, պարզ, ինչպես աչքի լույսը՝ ․․․ իմ հետապնդման միակ պատճառը ազգանունս է՝ ՖԱՐՄԱՆՅԱՆ, որով ես միայն հպարտանում եմ»։

Միևնույն ժամանակ նա գրառել է. «Այդուհանդերձ, հարուցված քրեական գործի և այս թրիլլերի ամենաանբարոյական մասը այն չէ, ինչ ներկայացրեցի, և այն չէ, որ այս էպիզոդներով ես եմ «նշանակվել մեղադրյալ»։ Դա, վստահաբար, կանցնի ու ամեն ինչ իր ճիշտ պատասխանը կստանա, նաև դատական կարգով։ Ամենաանբարոյականն այլ բան է։ Ոստիկանության Գյումրու Մուշի բաժնում հարուցվելիք քրեական գործի նյութերը նախապատրաստելիս, հանրային հնարավոր արձագանքն ու թամաշան կատարյա՜լ դարձնելու համար, ռեժիսորները փորձել են հաղորդումներ ու ցուցմունքներ ստանալ առ այն, որ ապրիլյան պատերազմի օրերին բուհում ուսանողներից գումար է հավաքվել և ․․․ յուրացվել։ Բարեբախտաբար, թրիլլերի անբարո պատվիրատուներն ու հլու հնազանդ կատարողները չեն կարողացել գտնել անբարոյականության իրենց աստիճանի վրա գտնվող որևէ մեկին՝ նման հաղորդում ու ցուցմունք կորզելու համար»:

Աղբյուր` Փաստինֆո