Փաստ ինֆո

Հատուկ քննչական ծառայության պետ Սասուն Խաչատրյանը վստահեցնում է, որ ՀՔԾ-ն որևէ ազդեցություն չունի և չի կարող ունենալ դատավորների վրա: Լրագրողների հետ ճեպազրույցում անդրադառնալով քննադատությանը, որ նա մարտի 1-ի գործի վերաբերյալ հեռուստատեսությամբ հնչեցրած իր վերլուծություններով միջամտում է քրեական գործին, ՀՔԾ պետն ասել է, որ դատարանն անկախ է, Հատուկ քննչական ծառայությունն ու  ծառայության պետը դատավորների նշանակման, նրանց աշխատանքից ազատելու, նրանց առաջխաղացման, կարգապահական պատասխանատվության ենթարկելու գործընթացներում որևէ ներգրավվածություն չունի և օբյեկտիվորեն չի կարող ազդեցություն ունենալ դատավորների վրա:

Ինչ վերաբերում է 0038 հույժ գաղտնի հրամանի՝ ոչ ամբողջական գաղտնազերծմանը, որն ըստ ՀՀ երկրորդ նախագահ Ռոբերտ Քոչարյանի պաշտպանների, կոնտեքստից կտրելու վտանգ է պարունակում, Սասուն Խաչատրյանը շեշտել է, որ այդ փաստաթուղթը գաղտնազերծելու իրավունքը պատկանում է ՀՀ պաշտպանության նախարարությանը։ «Պաշտպանության նախարարությունն է որոշել, թե ինչ չափով կարող է գաղտնազերծել այդ հրամանը, ուստի, կհորդորեմ պաշտպանական կողմին մեղադրանքները, որ իբր մենք չենքուզում հրապարակել ամբողջությամբ, այլևս չշահարկվեն, դա մեր ցանկությունը չէ»,-նշել է սասուն խաչատրյանը:

Հիշեցնենք, որ ՀՔԾ պետ Սասուն Խաչատրյանն օգոստոսի 3-ին Առաջին ալիքի «Օրակարգե-ի հետ հարցազրույցի շրջանակներում գաղտնազերծեց հույժ գաղտնի «0038ե հրամանից որոշ հատվածներ՝ նշելով, որ դրանք անհերքելի ապացույցներ են, որ ՀՀ երկրորդ նախագահը Զինված ուժերին ներքաշել է ներքաղաքական գործընթացների մեջ, ինչը թույլատրված չի եղել, և նպաստել է սահմանադրական կարգի տապալմանը: Բացի այդ, նա կարծիք հայտնեց, որ Վերաքննիչ դատարանը պետք է մերժի կալանավորումը որպես խափանման միջոց ընտրելու որոշման դեմ բողոքը, այսինքն՝ Ռոբերտ Քոչարյանը պետք է շարունակի կալանավորված մնալ գործի հետագա ընթացին չմիջամտելու համար:

Աղբյուր` Փաստինֆո