Փաստ ինֆո

ՀՀ ՔԿ Լոռու մարզային քննչական վարչության նախկին պետ, առանձնապես խոշոր չափերով կաշառք ստանալու և պաշտոնական լիազորությունները չարաշահելու մեջ մեղադրվող Թաթուլ Շուշանյանի գործով Վճռաբեկ բողոք է ներկայացվել: 

«Փաստինֆո»-ն Թաթուլ Շուշանյանի պաշտպան Ամրամ Մակինյանից տեղեկացավ, որ Վերաքննիչ դատարանի որոշումը իրենց տրամադրվելուց հետո Վճռաբեկ բողոք է ներկայացվել:

Հիշեցնենք, որ Թաթուլ Շուշանյանի նկատմամբ փետրվարի 7-ին որպես խափանման միջոց էր ընտրել կալանավորումը, դատարանի այս որոշումը բողոքարկվել էր նրա պաշտպանների կողմից և մայիսի 30-ին այն փոխարինվել էր այլընտրանքային խափանման միջոց՝ գրավով, սակայն այս որոշման դեմ դատավարական հսկողություն իրականացնող դատախազը վերաքննիչ բողոք էր ներկայացրել և հունիսի 20-ին Վերաքննիչ դատարանի կողմից բավարարվել է՝ վերացվելով այլընտրանքային խափանման միջոց գրավը:

Հիշեցնենք նաև, որ Քննչական կոմիտեն հայտարարել էր, որ բազմակողմանի քննության արդյունքում տվյալներ են ստացվել առ այն, որ սպանությունը պատվիրելու մեջ մեղադրվող Վահագն Աբգարյանի և սպանությունը կատարելու մեջ մեղադրվող Վլադիմիր Դավթյանի օգտին ապօրինի գործողություններ կատարելու համար պետական հատուկ ծառայություն իրականացնող ՀՀ քննչական կոմիտեի պաշտոնատար անձանցից մեկն իր լիազորությունների շրջանակներում ստացել է առանձնապես խոշոր չափերի կաշառք, իսկ մի շարք այլ պաշտոնատար անձինք, շահադիտական և անձնական այլ շահագրգռվածությունից ելնելով, իրենց պաշտոնեական դիրքն օգտագործել են ծառայության շահերին հակառակ:

Նշված քրեական գործով բազմակողմանի քննության արդյունքում տվյալներ են ստացվել՝ ՔԿ առանձին ծառայողների կողմից այդ քրեական գործով թույլ տրված հնարավոր չարաշահումների վերաբերյալ, և դրանց հիման վրա քննչական կոմիտեում հարուցվել է քրեական գործ, որն ուղարկվել է ՀՔԾ:

Վահագն Աբգարյանից առանձնապես խոշոր չափերով կաշառք ստանալու և պաշտոնեական լիազորությունները չարաշահելու համար Թաթուլ Շուշանյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով և 308-րդ հոդվածի 1-ին մասով:

Աղբյուր` Փաստինֆո