Փաստ ինֆո

Հայաստանի մի շարք էկոլոգներ Ամուլսարի «Անկախ խորհրդատվական խմբի» առաջին հաշվետվության ներկայացման ժամանակ մուտ գործեցին բանակցությունների սրահ և փոքրիկ բողոքի ակցիա իրականացրին ընդդեմ «Լիդիան Արմենիա» ընկերության:

«Արմենպրես»-ի հաղորդմամբ` բնապահպաններն իրենց դիրքորոշումները, տեսակետներն ու պահանջները ներկայացրին Ամուլսար ոսկու հանքը շահագործող ընկերությանը և Ամուլսարի «Անկախ խորհրդատվական խմբին»:

«Մենք եկել ենք, որպեսզի ասենք, որ «Լիդիան Ինթերնեյշնլ» ընկերությունը կեղծ տվյալների վրա հիմնված և կեղծ փաստաթղթեր ներկայացրած ընկերություն է »,- նշեց էկոլոգներից մեկը և հավելեց, որ իրենց կողմից մերժվել և մերժվելու են բոլոր անկախ խորհրդատվական կամ փորձագիտական խմբերը:

Բնապահպաններն իրենց բողոքի ակցիայի ժամանակ ներկայացրին միջազգային 4 փորձագետի համառոտ եզրակացություն, որ արել են վերջին 8 ամսվա ընթացքում` «Լիդիան Արմենիա» ընկերության փաստաթղթերն ուսումնասիրելուց հետո: Դրանք վերաբերում են հանքի թթվային դրենաժի և ջրերի աղտոտման խնդիրներին:

«Այդ ուսումնասիրություններն այսօր միակ անկախ փորձագիտական տվյալներն են, որոնց կարելի է հավատալ և ընդունել որպես հավաստի տեղեկություն: Մեզ չի հետաքրքրում հանքը շահագործող ընկերության հետ կապ ունեցող որևէ խորհրդատվական կամ փորձագիտական խմբի մոնիտորինգի արդյունք, հաշվետվություն»,- շեշտեցին նրանք:

Վերջում նրանք կոչ արեցին «Լիդիան Արմենիա» ընկերությանը, որպեսզի նրանք մոտակա ժամանակները սեփական կամքով հեռանան Հայաստանից, բայց մինչ այդ վերականգնեն հասցված վնասը:

«Լիդիան Արմենիան» հայկական երկրաբանահետախուզական կազմակերպություն է: Հիմնադրվել է 2005 թ.-ին և լայնամասշտաբ երկրաբանահետախուզական աշխատանքների արդյունքում հայտնաբերել է ներկայում իր առաջնային ծրագիրը հանդիսացող Ամուլսարի ոսկու հանքը: Ամուլսարը նոր հայտնաբերված ոսկու հանքավայր է` առաջինը Հայաստանում վերջին 20 տարիների ընթացքում:

Լիդիան Արմենիան երկրաբանահետախուզական աշխատանքներ է իրականացնում Հայաստանի Հանրապետության Վայոց ձորի մարզում` Ամուլսարի տարածքում՝ 2006թ.-ից սկսած: Վայոց ձորի և Սյունիքի մարզերի սահմանագլխին տեղակայված Ամուլսարի հանքավայրը գտնվում է Երևանից 170 կմ հարավ:

Աղբյուր` Փաստինֆո