Փաստ ինֆո

Առաջին վտանգը, որ տեսնում է երկրում ՀՀ ԱԺ ՀՀԿ խմբակցության պատգամավոր Արմեն Աշոտյանը, անարխիան է, այս մտահոգությունն, ըստ նրա, կիսում է նաև գործող իշխանությունը:

Ըստ պատգամավորի, երկրորդ վտանգը դրա հակընդդեմ վտանգն է՝ չափից ավելի մեծ ավտորիտար ճանապարհով գնալու գերկարգավորումների դաշտով քաղաքական այլախոհությունը սահմանափակելու կամ ճնշելու:

Այս ճանապարհն էլ, ըստ Արմեն Աշոտյանի, նույնպես ռիսկային է:

«Այսօր տեսնում եմ հանրային-քաղաքական քննարկումների դիսկուրսում այն կարծիքների նկատմամբ անհանդուրժողականություն, որոնք չեն համապատասխանում գործող իշխանությունների կամ իրենց ղեկավարի կարծիքների հետ»,- Ազգային ժողովում լրագրողների հետ զրույցում հայտարարել է Արմեն Աշոտյանը:

Երրորդ վտանգը, ըստ պատգամավորի, Հայաստանի համար պոպուլիզմի վտանգավոր այն աստիճանն է, որը կարող է էրոզիայի ենթարկել պետական մարմինների գործունեությունը: «Ես այս երեք վտանգներն եմ տեսնում: Չեմ ասում, որ դրանք արդեն ամբողջությամբ տեսանելի են: Եթե տեսանելի լինեին, դուք էլ կտեսնեիք: Սա իմ քաղաքական կանխատեսումներից է, որտեղ ես կցանկանամ սխալված լինել»,- ասել է Ա.Աշոտյանը:

Պատգամավորը հույս է հայտնել, որ իշխանությունները հնարավորինս հեռու կմնան իր նշած ռիսկային սցենարներից: Այս պարագայում, ըստ նրա, խորհրդարանական ընդդիմության կարևորագույն գործառույթներից է քաղաքական բազմակարծության ապահովումն ու խնդիրների մասին բարձրաձայնելը:

Աղբյուր` Փաստինֆո