Փաստ ինֆո

Երևանի ընդհանուր իրավասության դատարանի Շենգավիթ նստավայրում դատավոր Մեսրոպ Մակյանի նախագահությամբ քիչ առաջ մերժվեց «Սասնա Ծռեր-1» քրեական գործով մեղադրյալներ Պավել Մանուկյանի, Վարուժան Ավետիսյանի, Արայիկ Խանդոյանի, Մխիթար Ավետիսյանի, Գագիկ Եղիազարյանի, Արմեն Բիլյանի, Սմբատ Բարսեղյանի, Արեգ Կյուրեղյանի, Էդուարդ Գրիգորյանի և Սեդրակ Նազարյանի խափանման միջոց կալանավորումը փոխելու միջնորդությունները:

Խորհրդակցական սենյակից վերադառնալուց հետո դատավոր Մեսրոպ Մակյանը ընթերցեց որոշումը, ըստ որի՝ մերժվել են խափանման միջոց ընտրված կալանավորումը վերացնելու և այն գրավով փոխելու վերաբերյալ միջնորդությունները: Դատավորը նշեց, որ այս պահին առկա են ՀՀ քրեական դատավարության օրենսգրքի 135-րդ հոդվածով նախատեսված վտանգները:

«Ինչպես և նախկինում այնպես էլ այսօր որոշում կայացնելիս բացառապես ղեկավարվել ենք օրենքով, հետևաբար՝ դատարանի համար անընդունելի է կողմերի արտահայտած այն դիրքորոշումները, թե դատարանը նախկինում կամ ներկայումս ղեկավարվել է որևէ մեկի ցուցումով կամ պահանջով»,- ասաց Մակյանը:

Ամբաստանյալները և փաստաբանները ցուցադրաբար լքեցին դատական նիստերի դահլիճը:

Դատավոր Մակյանը որոշում կայացրեց սանկցիա կիրառել՝ բոլոր ամբաստանյալներին հեռացնելով դատական նիստերի դահլիճից 10 ժամ ժամկետով:

Փաստաբանների նկատմամբ դատավորը կիրառեց սանկցիա նկատողություն և համապատասխան գրություն կուղարկի Փաստաբանների պալատ:

Հաջորդ դատական նիստը կկայանա մայիսի 23-ին:

Նշենք, որ այսօր դատական նիստին զուգընթաց մի շարք ակտիվիստներ միակողմանի փակել էին Արշակունյաց պողոտան՝ պահանջելով, որ նախագահող դատավոր Մեսրոպ Մակյանը բավարարի մեղադրյալների խափանման միջոց կալանքը փոխելու վերաբերյալ պաշտպանների միջնորդությունը:

Աղբյուր` Փաստինֆո