Փաստ ինֆո

Դատավորի փոփոխությունից հետո Երևանի ընդհանուր իրավասության դատարանում՝ դատավոր Արշակ Վարդանյանի նախագահությամբ, այսօր տեղի ունեցավ «Սասնա ծռեր»-2, այն է՝ Արամ Մանուկյանի և ևս տասն անձանց վերաբերյալ, գործով առաջին դատական նիստը, վերսկսվեց գործով դատաքննությունը:

Ինչպես և ակնկալվում էր, դատավարական որոշակի ընթացակարգեր անցնելուց հետո դատարանում պաշտպանական կողմը հանդես եկավ պաշտպանյալների խափանման միջոց կալանավորումը վերացնելը, այն փոփոխելու կամ գրավ կիրառելու միջնորդություններով:

Մասնավորապես, փաստաբան Դավիթ Գյուրջյանը միջնորդեց իր պաշտպանյալներ Վարդան Գերավետյանին ու Արամ Հակոբյանին ազատ արձակել: Ըստ պաշտպանի, իր պաշտպանյալների հայտարարությունների համաձայն, արարքները կատարվել են իշխանությունը յուրացրած անձանց դեմ ապստամբելու շրջանակում:

Պաշտպանը նշեց նաև, որ դատաքննություն նշանակելու որոշմամբ դատարանը անփոփոխ է թողել կալանավորումը, ինչը նախատեսված չէ օրենսդրությամբ, այսինքն՝ կալանավորումն ապօրինի է: Դ.Գյուրջյանը միջնորդեց նաև իր պաշտպանյալ Արամ Հակոբյանի նկատմամբ նշանակել դատաբժշկական փորձաքննություն:

Պաշտպանյալը՝ Վ.Գերավետյանն, իր հերթին հայտարարեց, որ «հայ ժողովրդից թաքնվելու կարիք չունենք, դա վիրավորական է»: «Սասնա ծռերը» չեն խուսափել ու չեն խուսափի պատասխանատվությունից, միակ դատավորը ժողովուրդն է, ասաց նա: Արամ Հակոբյանն ևս միացավ միջնորդությանը:

Փաստաբան Մուշեղ Շուշանյանը հայտարարեց, որ «Սասնա ծռերը» քրեական օրենքով արգելված որևէ արարք չեն կատարել, ապստամբել են բռնապետության դեմ: Ապստամբելը բնական իրավունք է, երբ առկա է իշխանության յուրացման փաստ, ասաց պաշտպանը:

Մ.Շուշանյանը նշեց, որ ի սկզբանե իսպառ բացակայել են Տիգրան Մանուկյանին ու Սերգեյ Կյուրեղյանին կալանքի տակ պահելու հիմքերը: Իսկ այս պահի դրությամբ նաև Հայաստանում քաղաքական իրադրություն է փոխվել:

Պաշտպանը միջնորդեց ազատ արձակել իր պաշտպանյալներին, եթե դատարանը անհնարին գտնի կալանավորումը վերացնելը, նա միջնորդեց կալանավորումը փոխարինել չհեռանալու մասին ստորագրությամբ:

Փաստաբան Լիպարիտ Սիմոնյանը ևս նշեց, որ իր պաշտպանյալ Թորոս Թորոսյանին կալանքի տակ պահելն անհիմն է, քանի որ չկա կալանքի ժամկետը երկարացնելու օրինական որոշում, ուստի միջնորդեց փոփոխել խափանման միջոցը:

Փաստաբան Արայիկ Պապիկյանը համանման միջնորդություններ արեց իր պաշտպանյալներ Գևորկ Իրիցյանի ու Թաթուլ Թամրազյանի վերաբերյալ:

Փաստաբան Հայարփի Սարգսյանը հերթական անգամ անդրադարձավ իր պաշտպանյալ Հովհաննես Հարությունյանի առողջական վիճակին. նա հրազենային վիրավորում է ստացել, ծունկը փշրվել է, և մինչև օրս նա պատշաճ բուժում չի ստացել, ինչն արձանագրվել է նաև ՄԻԵԴ համապատասխան որոշմամբ: Այդպիսի առողջական խնդիրներով Հ.Հարությունյանը գտնվում է անմարդկային պայմաններում, այսինքն՝ առկա են ՄԻԵԿ երրորդ հոդվածի՝ Խոշտանգումների արգելում, խախտման հիմքեր:

Պաշտպանը նշեց, որ իր պաշտպանյալի կալանավորումը ապօրինի է, նրա նկատմամբ չեն կիրառվել նաև մեղադրանքի հոդվածներով նախատեսված խրախուսական նորմերը:
Հ.Սարգսյանը միջնորդեց իր պաշտպանյալի խափանման միջոց կալանավորումը վերացնել, չվերացնելու դեպքում կիրառել գրավ կամ փոփոխել չհեռանալու ստորագրությամբ:

Արամ Մանուկյանի պաշտպան Ինեսսա Պետրոսյանը նույնպես միջնորդեց ազատ արձակել կամ փոփոխել խափանման միջոցը, կամ ճանաչել գրավի թույլատրելիությունը:

Արամ Մանուկյանի մյուս պաշտպանը՝ Հրանտ Գևորգյանը հայտարարեց, որ Արամ Մանուկյանը տուժող է, նա վնասվածք է ստացել, երբ անզեն օգնության էր շտապում հորը՝ Պավել Մանուկյանին: Պաշտպանական կողմը նկատեց, որ խափանման միջոցի հարցը պետք է բարձրացներ մեղադրող կողմը, ուստի հորդոր հնչեց՝ ուղղված դատախազներին, ցույց տվեք, որ արդար եք, անկախ եք ու ծառայում եք միայն ու միայն Հայաստանի Հանրապետությանը:

Արայիկ Հակոբյանի ու Մարտիրոս Հակոբյանի պաշտպան Լուսինե Սահակյանը ևս գտավ, որ դատարանն անհապաղ պետք է ազատ արձակի անձանց՝ երկրում իրավիճակ է փոխվել: Ազատության մեջ հայտնվելու դեպքում փախչելու կամ թաքնվելու կասկածի հետ կապված պաշտպանը հայտարարեց՝ մեր պաշտպանյալները կառչած են իրենց հողին, երբեք փախչելու մտադրություն չեն ունեցել:

Նրանք քաղբանտարկյալներ են, չպետք է ունենանք քաղբանտարկյալներ, մենք ունենք մեկ խնդիր լուծելու՝ ժամ առաջ ազատ արձակել, ասաց Լուսինե Սահակյանը:

Մեղադրող կողմը չառարկեց Արամ Հակոբյանի նկատմամբ դատաբժշկական փորձաքննություն նշանակելու միջնորդության դեմ: Մեղադրող կողմը նշեց, որ չեն կիսում պաշտպանական կողմի տեսակետը գործի քաղաքական լինելու մասին, գործողությունները, նպատակները ենթադրաբար պարունակում են հանցագործության հատկանիշներ:

Մեղադրող կողմը չընդունեց նաև պաշտպանների պնդումներն առ այն, որ կալանավորումը անփոփոխ թողնելու դատարանի որոշումները չեն բխում օրենսդրությունից: Ըստ մեղադրողի, դատաքննություն նշանակելու որոշման շրջանակում օրենսդրությունը նախատեսում է խափանման միջոցը փոփոխելու հնարավորություն, ինչը ենթադրում է նաև այն անփոփոխ թողնելու հնարավորություն: Չկան փաստական հանգամանքներ առ այն, որ վերացել են կալանավորումն ընտրելու հիմքերը, բոլոր գործողությունները պետք է կատարվեն օրենքի տառին համապատասխան, ասաց մեղադրանքի կողմը:

Ի պատասխան Արամ Մանուկյանի պաշտպան Հարություն Բաղդասարյանը հակադարձեց՝ հիշատակելով օրենքով՝ ՀՀ քրեական օրենսգրքի 44-րդ հոդվածով՝ ծայրահեղ անհրաժեշտությունը, և 46-րդ հոդվածով՝ Հիմնավորված ռիսկը, ամրագրված նորմերը:

Միջնորդությունների վերաբերյալ դատարանը որոշումները կհրապարակի 17.45-ին:

Աղբյուր` Փաստինֆո