Փաստ ինֆո

ՀՅԴ-ն ներկայացնող պատգամավոր Աղվան Վարդանյանը հայտարարեց, որ   Նիկոլ Փաշինյանի օգտին չի կարող քվեարկել։ Իսկ եթե կուսակցությունը որոշեց քվեարկել Նիկոլ Փաշինյանի օգտին, ապա պատրաստ է հրաժարվել մանդատից։

«Անսահման դժվար է հոսանքին հակառակ գնալը։ Բարձր եմ գնահատում Նիկոլի անձնազոհությունը ու վճռականությունը։ Հավատում եմ նրա ձգտումների ազնվությանը։ Բայց ես  երբեք անձերով չեմ առաջնորդվել, կուռքեր չեմ ընդունում։ Ես վտանգի կանխազգացում ունեմ։ Այս պայմաններում չեմ կարող վստահ լինել, որ այս ամենը շատ ավելի մեծ խաղի բարդ ու բազմաշերտ սցենարների համակցություն չէ առայժմ առանց ինձ հայտնի ծալքերով, շահերով ու հետեւանքներով։ Վստահ եղեք, որ ես առանց հիմքերի ոչինչ չեմ ասում։ Եթե այդ ծալքերը ինձ համար պարզ չեն, չեմ էլ կարող բացառել, որ  դրանք անդառնալի ողբերգական հետեւանքներ չեն ունենալու իմ ժողովրդի, հրապարակի հրաշալի երիտասարդության, Արցախի եւ իմ պետականության համար։ Ես եւս ժողովուրդ եմ։ Ես եւս ոգեւորված եմ այս շարժմամբ, այս անկախության սերնդով եւ ուզում եմ կուտակված հսկայական էներգիան ծառայի պետականության հզորացմանը։ Հանկարծ նոր հուսախաբության, կորուստների դուռ չբացվի։ 

Այս իրողություններից, այս հաստատումներից մեկնելով չեմ կարող անձնական պատասխանատվություն ստանձնել եւ կողմ քվեարկել պարոն Փաշինյանին։ Հակառակ պարագայում երեսպաշտորեն խախտած կլինեմ խղճով եւ համոզմունքներով քվեարկելու իմ սահմանադրական իրավունքը։ Անկեղծ ասած՝ սա ընտրություն էլ չէ։ Ինձ երկու տարբերակ են թողել քվեարկել կամ Նիկոլին կամ Փաշինյանին։ Հարգելի խորհրդարան, ես չեմ քվեարկելու, բայց սա հարցի մի կողմն է։ Ես դաշնակցական եմ եւ ՀՅԴ խմբակցությունն եմ ներկայացնում, որը կողմ քվեարկելու որոշում ունի։ Ինձ համար այս դժվար երկվությունից դուրս գալու մի ելք կա։ Եթե իմ կուսակցությունը պահանջի, պատրաստ եմ վայր դնել մանդատս։»,-հայտարարեց Աղվան Վարդանյանը եւ բոլոր կողմերից պահանջեց բացառել ցանկացած բռնություն եւ բախում, միասին կազմակերպել արտահերթ ընտրություններ։

Ապա խոսքն ուղղելով ՀՀԿ-ին՝ նշեց, որ պետք է գիտակցեն, որ անցյալին վերադարձ չի լինելու։

Աղբյուր` Փաստինֆո