Փաստ ինֆո

Առանձնապես խոշոր չափերով կաշառք ստանալու մեջ մեղադրվող ՀՀ քննչական կոմիտեի զինվորական քննչական գլխավոր վարչության ՀԿԳ ավագ քննիչ Մանվել Ադամյանի առողջական վիճակը կալանավորվելուց հետո վատացել է: 

Այդ մասին «Փաստինֆո»-ի թղթակցի հետ զրույցում հայտնեց պաշտպան Սամվել Հովհաննիսյանը՝ հավելելով, որ «Վարդաշեն» ՔԿՀ-ի բժշկի կողմից պահանջվել է Ադամյանի առողջական վիճակի վերաբերյալ բոլոր փաստաթղթերը՝ ուսումնասիրելու և հետազոտություններ անցկացնելու նպատակով:

Պաշտպանի խոսքով՝ Ադամյանը թոքի քաղցկեղի վիրահատության ենթարկվել, շաքարային դիաբետով է տառապում, պարբերաբար հետազոտությունների է ենթարկվում և գտնվում է բժիշկների հսկողության ներքո, «մինչ կալանավորվելը քիմիա է ընդունել, այժմ էլ ցավեր ունի»:

Ինչ վերաբերում է մեղադրանքին, ապա պաշտպանն ասաց, որ ցանկության դեպքում նույնիսկ Ադամյանը չէր կարող սուբյեկտ հանդիսանալ, ոչ մի ցուցմունքի չկա նրա դեմ և նրա առնչությունը մեղադրանքին հիմնավորված չէ:

Ըստ պաշտպանի՝ մինչ այս պահը իր պաշտպանյալի մասնակցությամբ քննչական գործողություն չի կատարվել, Ադամյանը պատրաստ է ցուցմունք տալ, սակայն ինչի՞ շուրջ ցուցմունք տա, եթե ժամկետային զինվորական ծառայությունից ազատելու դիմաց ինչպես մեղադրանքում է նշվում կաշառք է վերցրել, սակայն տվյալ անձինք նույնիսկ Ադամյանի անունը չեն լսել, չգիտեն ով է նա, ինչ գումարային հարցերի մասին է խոսքը:

Փաստաբան Սամվել Հովհաննիսյանի խոսքով՝ նախաքննական մարմինը ապացույցներ չի ներկայացրել եւ կարծում է， որ մեղադրանքը կփոխվի: Ներկայիս մեղադրանքի համաձայն քննիչը ոչ թե իր վարույթում քննվող քրեական գործով է կաշառք վերցրել, այլ, իբր, պարտադիր ժամկետային զինվորական ծառայությունից ապօրինի ազատելու համար։ Մինչդեռ՝ զինվորական ծառայությունից ազատելը քննիչի լիազորությունների շրջանակից դուրս է։

Պաշտպանը նշեց նաև, որ Ադամյանին կալանավորելու առաջին ատյանի դատարանի որոշումը բողոքարկել է վերաքննիչ դատարան:

Հիշեցնենք, որ ՀՔԾ-ն ավելի վաղ հայտնել էր, որ այս գործով 9 անձ է որպես մեղադրյալ ներգրավված այդ թվում նաև ՀԿԳ ավագ քննիչ Մանվել Ադամյանը:

Այսպիսով, ըստ այդ հաղորդագրության՝ մի շարք ՀՀ քաղաքացիներ իրենց զավակներին պարտադիր ժամկետային զինվորական ծառայությունից ապօրինի ազատելու նպատակով առանձնապես խոշոր չափերով կաշառք են տվել ՀՀ քննչական կոմիտեի զինվորական քննչական գլխավոր վարչության ՀԿԳ ավագ քննիչին:

Դրա դիմաց վերջինս, օգտագործելով իր պաշտոնեական դիրքը, 2017թ.-ի սեպտեմբերից 2018թ.-ի հունվարն ընկած ժամանակահատվածում միջնորդ անձի օժանդակությամբ նպաստել է զորակոչիկների օգտին ակնհայտ ապօրինի գործողություններ կատարելուն, ինչի արդյունքում վերջիններս զինվորական ծառայության համար ճանաչվել են ոչ պիտանի և հաշվառվել պահեստազորում:

ՀՀ քննչական կոմիտեի ԶՔԳՎ ՀԿԳ ավագ քննիչին և նրան օժանդակող անձին մեղադրանքներ են առաջադրվել համապատասխանաբար ՀՀ քրեական օրենսգրքի 311-րդ հոդվածի 4-րդ մասի 2-րդ կետով և 38-311-րդ հոդվածի 4-րդ մասի 2-րդ կետով նախատեսված` առանձնապես խոշոր չափերով կաշառք ստանալու և դրան օժանդակելու համար:

Լուսանկարում՝ փաստաբան Սամվել Հովհաննիսյանը

Աղբյուր` Փաստինֆո