Փաստ ինֆո

Խորհրդարանն այսօր փակ գաղտնի քվեարկությամբ ընտրեց Հայաստանի Սահմանադրական դատարանի նախագահը: Այդ պաշտոնում առաջադրվել է Արդարադատության նախկին նախարար, Սահմանադրական փոփոխությունների համահեղինակ Հրայր Թովմասյանի թեկնածությունը:

Ձայների 64 կողմ և 27 դեմ քվեարկությամբ խորհրդարանն այսօր ընտրեց ՍԴ նախագահին:

Հրայր ԹովմասյանԻ թեկնածությունն առաջարկել է ԱԺ նախագահ Արա Բաբլոյանը:

ՍԴ նախագահ Հրայր Թովմասյանը նախօրեին խորհրդարանում հարց ու պատասխանի ժամանակ վստահեցրել էր, որ 2015թ. ՀՀ Սահմանադրության փոփոխությունների արդյունքում Սահմանադրական դատարան դիմելիության մակարդակը բարձրանալու է:

«Նույնական սուբյեկտների առկայության պարագայում մենք տեսնում ենք դիմելիության շատ ավելի մեծ աստիճան: Մյուս սուբյեկտների պարագայում դիմելիության հնարավորություններն ընդարձակելու կամ չընդարձակելու վերաբերյալ մեկնաբանություններից ես այս պահին ձեռնպահ կմնամ, որովհետև Ազգային ժողովն է այն սուբյեկտը, որ կարող է նման բան նախաձեռնել: Կարծում եմ, որ հիմա տեղին չէ, որ ես դրա մասին խոսեմ:

Թովմասյանը նաև խնդիր է տեսնում դատավորների կողմից քիչ դիմելու առումով: «Եթե մենք նայենք Գերմանիայի օրինակը, այնտեղ Սահմանադրական դատարան դիմողների 50-60 տոկոսը հենց դատավորներն են: Ես վստահ եմ, որ դատական իշխանության կենտրոնաձիգ համակարգից հավասարակշռված համակարգի անցման արդյունքում մեզ մոտ այս տոկոսը մեծանալու է: Որքա՞ն… Չեմ կարող ասել, սակայն որ դա լինելու է, վստահ եմ»,- ընդգծել էր Թովմասյանը:

Նշենք, որ «Ելք» խմբակցությունը նախապես հայտարարել էր՝ դեմ է քվեարկելու Թովմասյանի թեկնածությանը:

Հիշեցնենք, որ Գագիկ Հարությունյան, ով արդեն գլխավորում է Բարձրագույն դատական խորհուրդը` հրաժարական է տվել Սահմանադրական դատարանի նախագահի պաշտոնից:

Լուսանկարը՝ Ֆոտոլուրի

Աղբյուր` Փաստինֆո