Փաստ ինֆո

Օրեր առաջ հետաձգված՝ Գյումրիում Ավետիսյանների ընտանիքի անդամների դաժան սպանության գործի հետ կապված անհատական դիմումի գործով այսօր Սահմանադրական դատարանը նորից գնաց խորհրդակցական սենյակ որոշում կայացնելու: Դատարանը խորհրդակցական սենյակում կգտնվի նաև երկուշաբթի օրը, ըստ ամենայնի այդ օրն էլ կհրապարակվի դիմումի վերաբերյալ ՍԴ որոշումը:

Հիշեցնենք, որ մարտի 13-ին ՍԴ-ն՝ վերադառնալով խորհրդակցական սենյակից, որոշել էր հետաձգել գործի քննություն՝ հայտնելով, որ պատճառը մեկն է՝ լրացուցիչ ուսումնասիրության ենթարկել գործի հետ կապված պրակտիկան:

Գործը Սահմանադրական դատարանում քննվում է տուժողների իրավահաջորդներ Լուսինե Ավետիսյանի, Անահիտ Կոշտոյանի, Անդրանիկ Պողոսյանի, Նարինե Պողոսյանի (ներկայացուցիչ Արամազդ Կիվիրյան) անհատական դիմումի հիման վրա: Դիմողները խնդրում են որոշել ՀՀ քրեական դատավարության օրենսգրքի 60-րդ հոդվածի (Քաղաքացիական հայցվորը) 1-ին մասի, 154-րդ հոդվածի (Քաղաքացիական հայցի քննության ընթացքում կիրառվող օրենսդրությունը), 158-րդ հոդվածի (Քաղաքացիական հայցի հարուցումը) 2-րդ մասի, 159-րդ հոդվածի (Հայցադիմում ընդունելուց հրաժարվելը)՝ ՀՀ Սահմանադրությանը համապատասխանության հարցը:

Ըստ դիմողների, կյանքի իրավունքի խախտման հիմքով բարոյական վնասի հատուցման պահանջով իրենց քաղհայցը քննության առարկա չդարձնելու վերաբերյալ կայացված դատական ակտերն ուղղակիորեն առնչվում են դատարանի մատչելիության իրավունքի իրացման ընթացքին և ենթակա են բողոքարկման վերադասության կարգով՝ հաշվի առնելով և կարևորելով դատական լիարժեք պաշտպանության իրավունքը:

Հետևաբար, նման որոշումները բողոքարկելու իրավունքից զրկելը պետք է դիտվի որպես ոչ իրավաչափ:

Դիմողները մատնանշել են, որ ՀՀ քաղաքացիական դատավարության օրենսգիրքը նախատեսում է հայցադիմումը վերադարձնելու կամ հայցադիմումի ընդունումը մերժելու մասին որոշումների՝ վերադասության կարգով բողոքարկման հնարավորություն: Տվյալ պարագայում, դիմողների կարծիքով, անհասկանալի է օրենսդրի տարբերակված մոտեցումը քրեական դատավարության շրջանակներում քաղաքացիական հայցվորին հայցադիմումի մերժման որոշումը վերաքննության կարգով բողոքարկելու հնարավորությունից զրկելու առումով:

Ըստ դիմողների, իրենց նկատմամբ կիրառված ՀՀ քրեական դատավարության օրենսգրքի 376.1 հոդվածը (Առաջին ատյանի դատարանի դատական ակտերի բողոքարկումը), չնախատեսելով և չընձեռելով անձին դատական ակտը բողոքարկելու հնարավորություն, ինչպես նաև կախված այն հանգամանքից, թե դատավարական ինչ կարգով է անձը ներկայացրել հայցը, տարբերակված մոտեցում է ցուցաբերում խախտված իրավունքների վերականգնման համար նախատեսված ինստիտուտի նկատմամբ` մի դեպքում անձին հնարավորություն ընձեռելով բողոքարկելու դատարանի որոշումը, իսկ մեկ այլ դեպքում՝ ոչ, ինչպիսի պայմաններում չի ապահովվում իրավունքի սուբյեկտի իրավունքների լիարժեք իրացման հնարավորությունը:

Աղբյուր` Փաստինֆո