Փաստ ինֆո

23 տարվա վաղեմության, ծանրացուցիչ հանգամանքներում իրանահայ գործարարի սպանության գործով այսօրվա դատական նիստում հետազոտվեցին գործի գրավոր ապացույցները:

Մասնավորապես, ըստ դեպքի վայրի տեղազննության արձանագրության, դեպքի վայրում ոչ բոլոր պահարաններն են, որտեղ իրերը անկանոն են լցված եղել: Ամբաստանյալ Գեորգի Սաֆարյանը հայտարարեց՝ եթե 4-5 հոգով մտել էին գողություն կատարելու համար, ինչպե՞ս է պատահել, որ ոչ բոլոր պահարաններն են խառնված եղել:

Դատարանում հետազոտվեց նաև լուսանկարով անձին ճանաչման ներկայացնելու արձանագրությունը, ըստ որի գործով մեկ այլ ֆիգուրանտ Արթուր Թադևոսյանը լուսանկարով ճանաչել էր Գեորգի Սաֆարյանին և հայտնել, որ նա է խեղդել տուժողին:

Ի դեպ, ըստ դատաբժշկական փորձաքննության եզրակացության, տուժող Հայկ Աբրահամյանի մահը վրա է հասել մեխանիկական շնչահեղձության հետևանքով՝ հետևից օղ են գցել տուժողի պարանոցին ու խեղդել:

Մատնադրոշմային փորձաքննության եզրակացության համաձայն էլ, դեպքի վայրում հայտնաբերվել է Գեորգի Սաֆարյանի, ինչպես նաև այլ անձանց մատնահետքեր:

Ամբաստանյալի պաշտպան Աննա Ջուվանովան հարց ուղղեց դատարանին՝ որտե՞ղ են գործով իրեղեն ապացույցները, ի պատասխան մեղադրողը պարզաբանեց, որ դրանք գործին կցված չեն, քանի որ քննվել են դեպքի առթիվ հարուցված գործից անջատված գործով, որոշ իրեղեն ապացույցներ վերադարձվել են տուժողի իրավահաջորդին:

Այսօրվա դատական նիստին չէր ներկայացել գործով երեք վկա: Մեղադրող կողմը միջնորդեց հաջորդ դատական նիստին նրանց բերման ենթարկել: Ամբաստանյալը հայտարարեց, որ ինքը համաձայն չէ այդ միջնորդության հետ, ապա հռետորական հարց տվեց՝ ինչքանո՞վ են այդ վկաները կապված գործի և ինձ հետ:

Դատարանը պարզաբանեց ամբաստանյալին, որ դատարանը պարտավոր է հարցաքննել դատակոչված վկաներին, նրանց լսելուց ու նրանց ցուցմունքները հետազոտելուց հետո միայն դատարանը կարող է անդրադառնալ ցուցմունքների վերաբերելիության կամ թույլատրելիության հարցին:

Հաջորդ դատական նիստին դատարանը միջոցներ կձեռնարկի վկաների ներկայությունն ապահովելու ուղղությամբ: Մինչ այդ պաշտպանական կողմը կորոշի հարկ կա՞ ներկայացնել այս կամ այն այլ ապացույցը հետազոտելու միջնորդություն, թե՞ ոչ:

Հիշեցնենք, որ սպանությունը կատարվել է 23 տարի առաջ՝ 1995 թվականի հունվարի 26-ին: Սպանության երեք մասնակիցներ ավելի վաղ՝ անցյալ դարի 90-ականներին, դատապարտվել են: Իսկ ներկայումս դատարանում քննվող այդ գործով միակ ամբաստանյալ Գեորգի Սաֆարյանը ծանրացուցիչ հանգամանքներում կատարված սպանության և ավազակային հարձակման մեղադրանքներով 20 տարի հետախուզման մեջ է գտնվել:

Նույն` 95 թվականի մայիսի 30-ին նրա նկատմամբ հայտարարվել էր միջպետական, իսկ 99 թվականի նոյեմբերի 30-ին` միջազգային հետախուզում: 2014 թվականի հունվարին ոստիկանները օպերատիվ տեղեկություն էին ստացել, որ Գեորգի Սաֆարյանն ուրիշի անվան տակ բնակություն է հաստատել Ռուսաստանի Դաշնության Նովոկուզնեցկ քաղաքում, օպերատիվ տեղեկությունը հաստատվել են լուսանկարներով ու մատնահետքերով:

Ըստ դեպքի մասին ոստիկանության հաղորդագրության, նախապես հանցավոր համաձայնության գալով, չորս ընկեր գնացել էին Երևանի Կոմիտասի պողոտա, որտեղ բնակվում էր Իրանի Իսլամական Հանրապետության ազգությամբ հայ մի քաղաքացի` Հայկ Աբրահամյանը, որի հետ ընկերները մտերմություն էին հաստատել դեռևս 94 թվականին:
Տեղեկանալով, որ գործարարն Իրանից վերադարձել է մեծ գումարով և նպատակ ունի ասֆալտի գործարան կառուցել, երեկոյան ութն անց կեսին ընկերներից մեկը մնացել է շենքի մոտ, մյուս երեքը՝ մտել տուն:

Հայկի գարեջրի բաժակում թույն էին խառնել, «բայց գյուղինստիտուտի ուսանող Գեորգի Սաֆարյանի բերած թույնը միայն քնեցրել էր Հայկին»: Տղաները գործի էին դրել պահեստային տարբերակը` երկուսը բռնել էին Հայկին, իսկ Գեորգին, իր հետ բերած մետաղալարով խեղդամահ էր արել նրան: Տնից հափշտակելով միայն թանկարժեք իրեր` հանցախումբը հեռացել էր, նշվում է ոստիկանության հաղորդագրության մեջ:

Աղբյուր` Փաստինֆո